Subscribe to our newsletter and get our newest updates

Baqaullah Baqa

  • Ghazal


dast-e-naseh jo mere jeb ko is bar laga


dast-e-nāseh jo mire jeb ko is baar lagā
phāḌūñ aisā ki phir is meñ na rahe taar lagā

pahuñchī us but ko ḳhabar nāla-e-tanhā.ī kī
mudda.ī kaun khaḌā thā sar-e-dīvār lagā

maraz-e-ishq tumhārā to ye tūfāñ hai ki maiñ
jis se mazkūr kiyā us ko ye āzār lagā

jis kā mallāh banā ishq vo kashtī Duubī
us ke kehve se to beḌā na koī paar lagā

murġh-e-zīrak the tah-e-dām na aa.e hargiz
uḌ ga.e ham sar-e-sayyad pe minqār lagā

dard ye dil meñ uThā raat ki ho garm-e-tapish
uḌ gayā suune falak meñ par-e-ahrār lagā

parda-e-ḳhāk se dī mujh ko kisī ne āvāz
gor hamvār thī sunñe jo maiñ yakbār lagā

phir to ġhaflat-zada tā-ḳhvāb-e-adam hai yaañ tū
dekh le ham ko na Tuk dīda-e-bedār lagā

jab maiñ dekhūñ huuñ to kasrat hai ḳharīdāroñ kī
ghar meñ us ġhairat-e-yūsuf ke hai bāzār lagā

khīñch pīchhe ko qadam aah maiñ yaañ tak royā
ki mire aage 'baqā' dur kā ik ambār lagā

dast-e-naseh jo mere jeb ko is bar laga
phaDun aisa ki phir is mein na rahe tar laga

pahunchi us but ko KHabar nala-e-tanhai ki
muddai kaun khaDa tha sar-e-diwar laga

maraz-e-ishq tumhaara to ye tufan hai ki main
jis se mazkur kiya us ko ye aazar laga

jis ka mallah bana ishq wo kashti Dubi
us ke kehwe se to beDa na koi par laga

murgh-e-zirak the tah-e-dam na aae hargiz
uD gae hum sar-e-sayyad pe minqar laga

dard ye dil mein uTha raat ki ho garm-e-tapish
uD gaya sune falak mein par-e-ahrar laga

parda-e-KHak se di mujh ko kisi ne aawaz
gor hamwar thi sunne jo main yakbar laga

phir to ghaflat-zada ta-KHwab-e-adam hai yan tu
dekh le hum ko na Tuk dida-e-bedar laga

jab main dekhun hun to kasrat hai KHaridaron ki
ghar mein us ghairat-e-yusuf ke hai bazar laga

khinch pichhe ko qadam aah main yan tak roya
ki mere aage 'baqa' dur ka ek ambar laga


Source: Deewan-e-Aagha

Leave a comment

+