aise vo dāstān khīñchtā hai
har yaqīñ par gumān khīñchtā hai

terī furqat kā ek ik lamha
jism se merī jaan khīñchtā hai

jab bhī maiñ āsmāñ ko chhūne lagūñ
paañv ko mehrbān khīñchtā hai

manzil-e-zīst ke kisī bhī taraf
apnī jānib nishān khīñchtā hai

maiñ haqīqat jahāñ bhī likhtā huuñ
vo vahī dāstān khīñchtā hai

jab haqīqat bayāñ karūñ us kī
mere muñh se zabān khīñchtā hai

sar-zamīn-e-vatan pe ab vo 'nabīl'
apnā har sū makān khīñchtā hai

aise wo dastan khinchta hai
har yaqin par guman khinchta hai

teri furqat ka ek ek lamha
jism se meri jaan khinchta hai

jab bhi main aasman ko chhune lagun
panw ko mehrban khinchta hai

manzil-e-zist ke kisi bhi taraf
apni jaanib nishan khinchta hai

main haqiqat jahan bhi likhta hun
wo wahi dastan khinchta hai

jab haqiqat bayan karun us ki
mere munh se zaban khinchta hai

sar-zamin-e-watan pe ab wo 'nabil'
apna har su makan khinchta hai