Subscribe to our newsletter and get our newest updates

Ilyas Ishqi

  • Ghazal


samjhane walon ne kitna un ko samjhaya logo


samjhāne vāloñ ne kitnā un ko samjhāyā logo
phir bhī dhokā dil vāloñ ne hir-phir kar khāyā logo

nagrī nagrī phirā musāfir dukhī rahī kaayā logo
vīrāne meñ chain se soyā pā ke ghanā saayā logo

raajā parjā gyānī mūrakh jag se ḳhālī haath ga.e
kis ko ḳhabar kis ne kyā khoyā kis ne kyā paayā logo

fāsle kī aur vaqt duurī dil kā qurb miTā na sakā
kaisā kaisā pyārā chehra dhyān meñ dhundlāyā logo

kahāñ talak hai us kā tānā-bānā ye mālūm nahīñ
saañs kī is uljhī Dorī ko kis ne suljhāyā logo

in āñkhoñ ne jo kuchh dekhā kaun use sach mānegā
vaqt kī dhuup meñ chāñd sā chehra kaise suno laayā logo

duniyā-dārī kā har pahlū barat ke dekhā 'ishqī' ne
gāñTh girah kī kho kar us ne sab kuchh bhar paayā logo

samjhane walon ne kitna un ko samjhaya logo
phir bhi dhoka dil walon ne hir-phir kar khaya logo

nagri nagri phira musafir dukhi rahi kaya logo
virane mein chain se soya pa ke ghana saya logo

raja parja gyani murakh jag se KHali hath gae
kis ko KHabar kis ne kya khoya kis ne kya paya logo

fasle ki aur waqt duri dil ka qurb miTa na saka
kaisa kaisa pyara chehra dhyan mein dhundlaya logo

kahan talak hai us ka tana-bana ye malum nahin
sans ki is uljhi Dori ko kis ne suljhaya logo

in aankhon ne jo kuchh dekha kaun use sach manega
waqt ki dhup mein chand sa chehra kaise suno laya logo

duniya-dari ka har pahlu barat ke dekha 'ishqi' ne
ganTh girah ki kho kar us ne sab kuchh bhar paya logo


Source: Book : Pani Patthar (Pg. 124) Author : Yasiin Afzaal Publication : Maktaba Fikr-e-Nav (1986) Edition : 1986

Leave a comment

+