Subscribe to our newsletter and get our newest updates

Ghulam Husain Sajid

  • Ghazal


kabhi charagh kabhi rasta badal kar dekh


kabhī charāġh kabhī rāsta badal kar dekh
bahut qarīb hai manzil zarā sā chal kar dekh

tire hisār se bāhar nahīñ zamān-o-makāñ
tū merī tarah kisī aa.ine meñ Dhal kar dekh

faqīr ban ke vo aayā hai terī chaukhaT par
ye koī aur nahīñ hai zarā sambhal kar dekh

nigār-ḳhāna-e-gardūñ ko raakh karte hue
zarā sī der kisī tāqche meñ jal kar dekh

zamīn tañg huī jā rahī hai logoñ par
hudūd-e-qarya-e-jāñ se kabhī nikal kar dekh

ravāñ-davāñ haiñ kisī samt meñ ki sākit haiñ
phir ek baar sitāroñ kī aañkh mal kar dekh

ajiib lutf hai tark-e-nashāt meñ 'sājid'
jo ho sake to mirī baat par amal kar dekh

kabhi charagh kabhi rasta badal kar dekh
bahut qarib hai manzil zara sa chal kar dekh

tere hisar se bahar nahin zaman-o-makan
tu meri tarah kisi aaine mein Dhal kar dekh

faqir ban ke wo aaya hai teri chaukhaT par
ye koi aur nahin hai zara sambhal kar dekh

nigar-KHana-e-gardun ko rakh karte hue
zara si der kisi taqche mein jal kar dekh

zamin tang hui ja rahi hai logon par
hudud-e-qarya-e-jaan se kabhi nikal kar dekh

rawan-dawan hain kisi samt mein ki sakit hain
phir ek bar sitaron ki aankh mal kar dekh

ajib lutf hai tark-e-nashat mein 'sajid'
jo ho sake to meri baat par amal kar dekh


Source: Naqeeb-e-Sahar

Leave a comment

+