Subscribe to our newsletter and get our newest updates

Usha Bhadoriya

  • Ghazal


akasr meri zamin ne mere imtihan liye


akasr mirī zamīñ ne mire imtihāñ liye
zinda huuñ apne sar pe ka.ī āsmāñ liye

bechārgī kabhī mujhe sābit na kar sakī
kyā kyā mirī hayāt ne mere bayāñ liye

apnī sadāqatoñ se bhī lagne lagā hai Dar
chalnā hai is zamīñ pe sarāb-e-gumāñ liye

aur maiñ ki apnī zaat se nisbat nahīñ mirī
har shaḳhs phir rahā hai mirī dāstāñ liye

māñgī nahīñ hai maiñ ne kisī āsmāñ se dhuup
zinda huuñ apne hāthoñ meñ apnā jahāñ liye

saarā qusūr jaise mirī bebasī kā thā
ilzām apne sar pe kisī ne kahāñ liye

unvān iztirāb kiye kitne fāsle
tum ne qadam qadam pe mire imtihāñ liye

pahnā unheñ to maiñ bhī dhanak-posh ho ga.ī
apnā samajh ke maiñ ne tumhāre nishāñ liye

'ūshā' tamām umr kaTī intizār meñ
aayā na koī ghar meñ dil-e-mehrbāñ liye

akasr meri zamin ne mere imtihan liye
zinda hun apne sar pe kai aasman liye

bechaargi kabhi mujhe sabit na kar saki
kya kya meri hayat ne mere bayan liye

apni sadaqaton se bhi lagne laga hai Dar
chalna hai is zamin pe sarab-e-guman liye

aur main ki apni zat se nisbat nahin meri
har shaKHs phir raha hai meri dastan liye

mangi nahin hai main ne kisi aasman se dhup
zinda hun apne hathon mein apna jahan liye

sara qusur jaise meri bebasi ka tha
ilzam apne sar pe kisi ne kahan liye

unwan iztirab kiye kitne fasle
tum ne qadam qadam pe mere imtihan liye

pahna unhen to main bhi dhanak-posh ho gai
apna samajh ke main ne tumhaare nishan liye

'usha' tamam umr kaTi intizar mein
aaya na koi ghar mein dil-e-mehrban liye


Pachas Sala Intekhab"

Leave a comment

+