Subscribe to our newsletter and get our newest updates

Jaleel Manikpuri

  • Ghazal


baha kar KHun mera mujhse bole


bahā kar ḳhuun merā mujh se bole
ki le jiine se apne haath dho le

jo dil paayā hai to chaar ashk ro le
zamīñ achchhī milī hai biij bole

sadā apnī hai bāzār-e-junūñ meñ
dil apnā muft kā saudā hai jo le

vo jaate haiñ akele mere ghar se
nikal kar jaan tū hī saath ho le

khulegī zulf se ḳhud dil kī chorī
vo jaadū kyā na jo sar chaḌh ke bole

tujhe hai iḳhtiyār aanā na aanā
dil-e-muztar kā kahnā maan to le

ajal bolī ye turbat meñ liTā kar
bahut jaagā hai ab jī bhar ke so le

ghaTā.eñ jhūmtī haiñ mai-kade par
ki pariyāñ uḌ rahī haiñ baal khole

kisī ko de diyā dil muft apnā
'jalīl' aise hī to haiñ aap bhole

baha kar KHun mera mujh se bole
ki le jine se apne hath dho le

jo dil paya hai to chaar ashk ro le
zamin achchhi mili hai bij bole

sada apni hai bazar-e-junun mein
dil apna muft ka sauda hai jo le

wo jate hain akele mere ghar se
nikal kar jaan tu hi sath ho le

khulegi zulf se KHud dil ki chori
wo jadu kya na jo sar chaDh ke bole

tujhe hai iKHtiyar aana na aana
dil-e-muztar ka kahna man to le

ajal boli ye turbat mein liTa kar
bahut jaga hai ab ji bhar ke so le

ghaTaen jhumti hain mai-kade par
ki pariyan uD rahi hain baal khole

kisi ko de diya dil muft apna
'jalil' aise hi to hain aap bhole


Leave a comment

+