tumheñ batā.ūñ ki kis mashġhale se aa.ī hai
mirī nazar meñ chamak ratjage se aa.ī hai

ḳhayāl jaise hī aayā zarā sā dam le luuñ
to ik sadā-e-jaras qāfile se aa.ī hai

chamak rahī hai jabīñ naqsh-e-pā kī barakat se
vo bil-yaqīñ tire rāste se aa.ī hai

ye kyā ajab hai ki mujh ko hī kuchh nahīñ ma.alūm
jo merī baat tire vāste se aa.ī hai

tum apne jism kī ḳhushbū sambhāl kar rakhnā
ye bahkī bahkī sadā aa.ine se aa.ī hai

bas itnī zid thī musallā bichhā ke piinā hai
palaT ke merī anā mai-kade se aa.ī hai

jise bhulā.e zamāna guzar chukā thā 'sabā'
usī kī yaad baḌe valvale se aa.ī hai

tumhein bataun ki kis mashghale se aai hai
meri nazar mein chamak ratjage se aai hai

KHayal jaise hi aaya zara sa dam le lun
to ek sada-e-jaras qafile se aai hai

chamak rahi hai jabin naqsh-e-pa ki barakat se
wo bil-yaqin tere raste se aai hai

ye kya ajab hai ki mujh ko hi kuchh nahin malum
jo meri baat tere waste se aai hai

tum apne jism ki KHushbu sambhaal kar rakhna
ye bahki bahki sada aaine se aai hai

bas itni zid thi musalla bichha ke pina hai
palaT ke meri ana mai-kade se aai hai

jise bhulae zamana guzar chuka tha 'saba'
usi ki yaad baDe walwale se aai hai