Subscribe to our newsletter and get our newest updates

Imdad Ali Bahr

  • Ghazal


waqt-e-aKHir hamein didar dikhaya na gaya


vaqt-e-āḳhir hameñ dīdār dikhāyā na gayā
ham to duniyā se ga.e aap se aayā na gayā

rāz-poshī se kabhī haath uThāyā na gayā
nabz dikhlā.e maraz apnā batāyā na gayā

phuuT niklī na rukī siine kī andar ḳhushbū
mushk thā dāġh-e-mohabbat ki chhupāyā na gayā

merā dil kis ne liyā naam batā.ūñ kis kā
maiñ huuñ yā aap haiñ ghar meñ koī aayā na gayā

haath uThā baiThe ham is zindagī-e-shīrīñ se
ġham judā.ī kā ye thā talḳh ki khāyā na gayā

jab kiyā qasd ki ehsān kisī kā luuñ maiñ
aabrū ghaTne lagī haath baḌhāyā na gayā

aaj vo haal hai apnā jo kisī ne pūchhā
ho ga.e qufl-e-dahan-sharm batāyā na gayā

rañj pūchhā jo mohabbat meñ to rāhat samjhe
dukh uThāyā kabhī dil us se uThāyā na gayā

kuchh na pūchho lab-e-shīrīñ kī halāvat ham se
ye vo halvā hai kabhī baañT ke khāyā na gayā

haif āñkhoñ ne bhī dekhī na mirī tishna-labī
muñh meñ paanī mizha-e-tursī chuvāyā na gayā

nā-tavānī kā burā ho ham udhar ko jo chale
tivr aa aa ga.e gir gir paḌe jaayā na gayā

maġhz chāTā kabhī andoz-o-nasīhat vaale
ġham hamārā kisī ġham-ḳhvār se khāyā na gayā

dost kab dost kā hotā hai muḳhill-e-rāhat
so ga.e paañv to hāthoñ se jagāyā na gayā

kab harārā dil-e-betāb kā rone se miTā
sho.ala-e-barq kabhī muñh se bujhāyā na gayā

āmad-e-yār kī kyā kyā na sunī garm ḳhabar
umr-bhar rāsta dekhā koī aayā na gayā

jis ke juuyā hue ham DhūñDh nikālā us ko
aql ġham hai ki mizāj aap kā paayā na gayā

us ke kūche se za.īfī meñ bhī uTThe na qadam
sar pe dhuup aa ga.ī dīvār kā saayā na gayā

qat.a jab se huī ummīd-e-visāl-e-jānāñ
is tarah baiTh gayā dil ki uThāyā na gayā

jāgnā hī mirī taqdīr meñ kyā likkhā thā
shab-e-furqat meñ ajal se bhī sulāyā na gayā

qasd thā 'bahr' kā but-ḳhāne se ka.abe kī taraf
lā-ubālī hai ḳhudā jaane gayā yā na gayā

waqt-e-aKHir hamein didar dikhaya na gaya
hum to duniya se gae aap se aaya na gaya

raaz-poshi se kabhi hath uThaya na gaya
nabz dikhlae maraz apna bataya na gaya

phuT nikli na ruki sine ki andar KHushbu
mushk tha dagh-e-mohabbat ki chhupaya na gaya

mera dil kis ne liya nam bataun kis ka
main hun ya aap hain ghar mein koi aaya na gaya

hath uTha baiThe hum is zindagi-e-shirin se
gham judai ka ye tha talKH ki khaya na gaya

jab kiya qasd ki ehsan kisi ka lun main
aabru ghaTne lagi hath baDhaya na gaya

aaj wo haal hai apna jo kisi ne puchha
ho gae qufl-e-dahan-sharm bataya na gaya

ranj puchha jo mohabbat mein to rahat samjhe
dukh uThaya kabhi dil us se uThaya na gaya

kuchh na puchho lab-e-shirin ki halawat hum se
ye wo halwa hai kabhi banT ke khaya na gaya

haif aankhon ne bhi dekhi na meri tishna-labi
munh mein pani mizha-e-tursi chuwaya na gaya

na-tawani ka bura ho hum udhar ko jo chale
tiwr aa aa gae gir gir paDe jaya na gaya

maghz chaTa kabhi andoz-o-nasihat wale
gham hamara kisi gham-KHwar se khaya na gaya

dost kab dost ka hota hai muKHill-e-rahat
so gae panw to hathon se jagaya na gaya

kab harara dil-e-betab ka rone se miTa
shoala-e-barq kabhi munh se bujhaya na gaya

aamad-e-yar ki kya kya na suni garm KHabar
umr-bhar rasta dekha koi aaya na gaya

jis ke juya hue hum DhunDh nikala us ko
aql gham hai ki mizaj aap ka paya na gaya

us ke kuche se zaifi mein bhi uTThe na qadam
sar pe dhup aa gai diwar ka saya na gaya

qata jab se hui ummid-e-visal-e-jaanan
is tarah baiTh gaya dil ki uThaya na gaya

jagna hi meri taqdir mein kya likkha tha
shab-e-furqat mein ajal se bhi sulaya na gaya

qasd tha 'bahr' ka but-KHane se kabe ki taraf
la-ubaali hai KHuda jaane gaya ya na gaya


Leave a comment

+