damak uThī hai fazā māhtāb-e-ḳhvāb ke saath
dhaḌak rahā hai ye dil kis rabāb-e-ḳhvāb ke saath

haTe ġhubār jo lau se to merī jot jage
jalūñ maiñ phir se na.ī āb-o-tāb-e-ḳhvāb ke saath

hai sau adāoñ se uryāñ fareb-e-rañg-e-anā
barahna hotī hai lekin hijāb-e-ḳhvāb ke saath

to kyuuñ sazā meñ ho tanhā gunāhgār koī
yahāñ to jiite haiñ sab irtikāb-e-ḳhvāb ke saath

sharār-e-sañg se sañglāḳh ho ga.e talve
huā na kuchh dil-e-ḳhāna-ḳharāb-e-ḳhvāb ke saath

sulā.e rakkhā hameñ bhī fareb-e-manzil ne
chale the ham bhī kisī ham-rakāb-e-ḳhvāb ke saath

surāġh miltā nahīñ pyaas ke safīnoñ kā
bhañvar bhī hote haiñ shāyad sarāb-e-ḳhvāb ke saath

haqīqatoñ kī chaTānoñ pe chal gayā jaadū
lo vo bhī chalne lagīñ ab sahāb-e-ḳhvāb ke saath

ajab nahīñ vahī manzar nazāra ban jaa.e
Darā rahā hai ye Dar iztirāb-e-ḳhvāb ke saath

darāḌeñ rah ga.iiñ bedāriyoñ ke naqshe par
na ham rahe na vo tum inqalāb-e-ḳhvāb ke saath

nigāh-e-dīda-e-ta.abīr ke havāle 'ḳhalish'
hai ye bayāz alag intiḳhāb-e-ḳhvāb ke saath

damak uThi hai faza mahtab-e-KHwab ke sath
dhaDak raha hai ye dil kis rabab-e-KHwab ke sath

haTe ghubar jo lau se to meri jot jage
jalun main phir se nai aab-o-tab-e-KHwab ke sath

hai sau adaon se uryan fareb-e-rang-e-ana
barahna hoti hai lekin hijab-e-KHwab ke sath

to kyun saza mein ho tanha gunahgar koi
yahan to jite hain sab irtikab-e-KHwab ke sath

sharar-e-sang se sanglaKH ho gae talwe
hua na kuchh dil-e-KHana-KHarab-e-KHwab ke sath

sulae rakkha hamein bhi fareb-e-manzil ne
chale the hum bhi kisi ham-rakab-e-KHwab ke sath

suragh milta nahin pyas ke safinon ka
bhanwar bhi hote hain shayad sarab-e-KHwab ke sath

haqiqaton ki chaTanon pe chal gaya jadu
lo wo bhi chalne lagin ab sahab-e-KHwab ke sath

ajab nahin wahi manzar nazara ban jae
Dara raha hai ye Dar iztirab-e-KHwab ke sath

daraDen rah gain bedariyon ke naqshe par
na hum rahe na wo tum inqalab-e-KHwab ke sath

nigah-e-dida-e-tabir ke hawale 'KHalish'
hai ye bayaz alag intiKHab-e-KHwab ke sath

Source: Book : Koi bhi rut ho (Pg. 51) Author : Farah iqbal Publication : Alhamd Publications (2011) Edition : 2011