Subscribe to our newsletter and get our newest updates

Deepti Mishra

  • Ghazal


sab kuchh jhuT hai lekin phir bhi bilkul sachcha lagta hai


sab kuchh jhuuT hai lekin phir bhī bilkul sachchā lagtā hai
jān-būjh kar dhoka khānā kitnā achchhā lagtā hai

iiñT aur patthar miTTī gaare ke mazbūt makānoñ meñ
pakkī dīvāroñ ke pīchhe har ghar kachchā lagtā hai

aap banātā hai pahle phir apne aap miTātā hai
duniyā kā ḳhāliq ham ko ik ziddī bachcha lagtā hai

is ne saarī qasmeñ toḌeñ saare va.ade jhūTe the
phir bhī ham ko us kā honā ab bhī achchhā lagtā hai

use yaqīñ hai be-īmānī bin vo baazī jītegā
achchhā insāñ hai par abhī khilāḌī kachchā lagtā hai

sab kuchh jhuT hai lekin phir bhi bilkul sachcha lagta hai
jaan-bujh kar dhoka khana kitna achchha lagta hai

inT aur patthar miTTi gare ke mazbut makanon mein
pakki diwaron ke pichhe har ghar kachcha lagta hai

aap banata hai pahle phir apne aap miTata hai
duniya ka KHaliq hum ko ek ziddi bachcha lagta hai

is ne sari qasmen toDen sare wade jhuTe the
phir bhi hum ko us ka hona ab bhi achchha lagta hai

use yaqin hai be-imani bin wo bazi jitega
achchha insan hai par abhi khilaDi kachcha lagta hai


Leave a comment

+