roz tabdīl huā hai mire dil kā mausam
roz kamre meñ mire sard havā aa.ī hai

fikr kī aañch meñ pighle to ye ma.alūm huā
kitne pardoñ meñ chhupī zaat kī sachchā.ī hai

roz ā.ankhoñ meñ utar jaatā hai ḳhanjar koī
in dinoñ ahl-e-nazar ko ġham-e-bīnā.ī hai

mere chehre se jo paḌh sakte ho paḌh lo yaaro
dil kī har baat mire lab pe kahāñ aa.ī hai

apne kāñdhe pe liye phirtī hai ehsās kā bojh
zindagī kyā kisī maqtal kī tamannā.ī hai

kyuuñ na 'tanvīr' phir iz.hār kī jur.at kiije
ḳhāmushī bhī to yahāñ bā.is-e-rusvā.ī hai

roz tabdil hua hai mere dil ka mausam
roz kamre mein mere sard hawa aai hai

fikr ki aanch mein pighle to ye malum hua
kitne pardon mein chhupi zat ki sachchai hai

roz aaankhon mein utar jata hai KHanjar koi
in dinon ahl-e-nazar ko gham-e-binai hai

mere chehre se jo paDh sakte ho paDh lo yaro
dil ki har baat mere lab pe kahan aai hai

apne kandhe pe liye phirti hai ehsas ka bojh
zindagi kya kisi maqtal ki tamannai hai

kyun na 'tanwir' phir izhaar ki jurat kije
KHamushi bhi to yahan bais-e-ruswai hai

Source: Book : Nuskha Hai Wafa (Kulliyat-e-Faiz) (Pg. 667) Publication : Educational Publishing House (2009) Edition : 2009