Subscribe to our newsletter and get our newest updates

Najeeb Ahmad

  • Ghazal


tera rang-e-basirat hu-ba-hu mujh sa nikal aaya


tirā rañg-e-basīrat hū-ba-hū mujh sā nikal aayā
tujhe maiñ kyā samajhtā thā magar tū kyā nikal aayā

zarā sā kaam paḌte hī mizāj ik ḳhāk-zāde kā
qad-o-qāmat maiñ gardūñ se bhī kuchh ūñchā nikal aayā

zar-e-ḳhushbū khanaktā rah gayā dast-e-gul-e-tar meñ
dil-e-sāda ḳharīdār-e-dil-e-sāda nikal aayā

ajab ik mo.ajaza is daur meñ dekhā ki pahlū se
yad-e-baizā nikaltā thā magar kaasa nikal aayā

kahānī jab bhī dohrā.ī pas-e-har-ābla-pā.ī
vahī mahmil vahī majnūñ vahī sahrā nikal aayā

'najīb' ik vahm thā do chaar din kā saath hai lekin
tire ġham se to saarī umr kā rishta nikal aayā

tera rang-e-basirat hu-ba-hu mujh sa nikal aaya
tujhe main kya samajhta tha magar tu kya nikal aaya

zara sa kaam paDte hi mizaj ek KHak-zade ka
qad-o-qamat main gardun se bhi kuchh uncha nikal aaya

zar-e-KHushbu khanakta rah gaya dast-e-gul-e-tar mein
dil-e-sada KHaridar-e-dil-e-sada nikal aaya

ajab ek moajaza is daur mein dekha ki pahlu se
yad-e-baiza nikalta tha magar kasa nikal aaya

kahani jab bhi dohrai pas-e-har-abla-pai
wahi mahmil wahi majnun wahi sahra nikal aaya

'najib' ek wahm tha do chaar din ka sath hai lekin
tere gham se to sari umr ka rishta nikal aaya


Source: Funoon(Jadeed Ghazal Number: Volume-002)

Leave a comment

+