bahā.ūñgā na maiñ aañsū na muskurā.ūñgā
ḳhamosh rah ke salīqe se ġham manā.ūñgā

karūñgā kaam vahī jo diyā gayā hai mujhe
meñ ḳhvāb dekhūñgā aur ḳhvāb hī dikhā.ūñgā

adhūrī baat bhī puurī samajhnī hogī tumheñ
maiñ kuchh batā.ūñgā aur kuchh nahīñ batā.ūñgā

maiñ aaj tak nahīñ maanā huuñ terī duniyā ko
tū maan jaa.e to maiñ us ko maan jā.ūñgā

isī savāl ne sone nahīñ diyā shab bhar
tū mujh se pūchhegā kyā aur maiñ kyā batā.ūñgā

tirī kahānī meñ rakkhūñgā ḳhud ko kuchh aise
maiñ dāstāñ meñ na.ī dāstāñ banā.ūñgā

ye maslahat hai mirī buz-dilī nahīñ 'taimūr'
jahāñ zarūrī huā hausla dikhā.ūñgā

bahaunga na main aansu na muskuraunga
KHamosh rah ke saliqe se gham manaunga

karunga kaam wahi jo diya gaya hai mujhe
mein KHwab dekhunga aur KHwab hi dikhaunga

adhuri baat bhi puri samajhni hogi tumhein
main kuchh bataunga aur kuchh nahin bataunga

main aaj tak nahin mana hun teri duniya ko
tu man jae to main us ko man jaunga

isi sawal ne sone nahin diya shab bhar
tu mujh se puchhega kya aur main kya bataunga

teri kahani mein rakkhunga KHud ko kuchh aise
main dastan mein nai dastan banaunga

ye maslahat hai meri buz-dili nahin 'taimur'
jahan zaruri hua hausla dikhaunga

Source: Book : Loban (Pg. 7) Author : Nadeem Farrukh