ye maanā nīñdoñ se aksar fareb khāte rahe
hamāre ḳhvāb magar phir bhī jagmagāte rahe

vo saada log kahīñ ab nazar nahīñ aate
jo dūsroñ ke liye rāsta banāte rahe

ka.ī sitāre jinheñ āsmāñ satātā rahā
unheñ zamīn pe lā kar hamīñ sajāte rahe

hamīñ ne lamhoñ ko yakjā kiyā to raat huī
hamīñ bikher kar lamhoñ ko din banāte rahe

farishtoñ jaise hī hote haiñ tajarbe 'dānish'
tamām umr hamīñ rāsta batāte rahe

ye mana nindon se aksar fareb khate rahe
hamare KHwab magar phir bhi jagmagate rahe

wo sada log kahin ab nazar nahin aate
jo dusron ke liye rasta banate rahe

kai sitare jinhen aasman satata raha
unhen zamin pe la kar hamin sajate rahe

hamin ne lamhon ko yakja kiya to raat hui
hamin bikher kar lamhon ko din banate rahe

farishton jaise hi hote hain tajarbe 'danish'
tamam umr hamin rasta batate rahe