aql pahuñchī jo rivāyāt ke kāshāne tak
ek hī rasm milī kaaba se but-ḳhāne tak

vādi-e-shab meñ ujāloñ kā guzar ho kaise
dil jalā.e raho paiġhām-e-sahar aane tak

ye bhī dekhā hai ki saaqī se milā jaam magar
hoñT tarse hue pahuñche nahīñ paimāne tak

regzāroñ meñ kahīñ phuul khilā karte haiñ
raushnī kho ga.ī aa kar mire vīrāne tak

ham-nashīñ kaT hī gayā daur-e-ḳhizāñ bhī āḳhir
zikr phūloñ kā rahā fasl-e-bahār aane tak

saarī uljhan hai sukūñ ke liye ai shauq Thahar
ġham kā tūfān-e-balā-ḳhez guzar jaane tak

zehn māyūs-e-karam shauq-e-nazāra sarshār
hosh meñ kaise rahūñ un kā payām aane tak

zaḳhm yādoñ ke mahakte haiñ ki aa.ī hai bahār
hai ye daulat ġham-e-daurāñ kī ḳhizāñ aane tak

be-niyāzī hai taġhāful hai ki be-zārī hai
baat itnī to samajh lete haiñ dīvāne tak

zindagī ġham se ulajhtī hī rahegī hamdam
vaqt kī zulf girah-gīr sulajh jaane tak

manzil-e-rāh talab thī to kahīñ aur magar
ruk ga.e ḳhud hī qadam pahuñche jo mai-ḳhāne tak

aql pahunchi jo riwayat ke kashane tak
ek hi rasm mili kaba se but-KHane tak

wadi-e-shab mein ujalon ka guzar ho kaise
dil jalae raho paigham-e-sahar aane tak

ye bhi dekha hai ki saqi se mila jam magar
honT tarse hue pahunche nahin paimane tak

regzaron mein kahin phul khila karte hain
raushni kho gai aa kar mere virane tak

ham-nashin kaT hi gaya daur-e-KHizan bhi aaKHir
zikr phulon ka raha fasl-e-bahaar aane tak

sari uljhan hai sukun ke liye ai shauq Thahar
gham ka tufan-e-bala-KHez guzar jaane tak

zehn mayus-e-karam shauq-e-nazara sarshaar
hosh mein kaise rahun un ka payam aane tak

zaKHm yaadon ke mahakte hain ki aai hai bahaar
hai ye daulat gham-e-dauran ki KHizan aane tak

be-niyazi hai taghaful hai ki be-zari hai
baat itni to samajh lete hain diwane tak

zindagi gham se ulajhti hi rahegi hamdam
waqt ki zulf girah-gir sulajh jaane tak

manzil-e-rah talab thi to kahin aur magar
ruk gae KHud hi qadam pahunche jo mai-KHane tak

RECITATIONS Nomaan Shauque



00:00/00:00 aql pahunchi jo riwayat ke kashane tak Nomaan Shauque

Source: