maiñ chāhūñ bhī to zabt-e-guftugū maiñ lā nahīñ saktā
samajhne par bhī dil kā mudda.ā samjhā nahīñ saktā

bhalā aisī tahī-dāmāñ tamannāoñ se kyā hāsil
bahalne par dil āmāda hai aur bahlā nahīñ saktā

ḳhudā mahfūz rakkhe ḳhauf-e-āseb-e-asīrī se
maiñ gulshan meñ bhī āzādī kā naġhma gā nahīñ saktā

rag-e-gul se bhī nāzuk-tar haiñ tinke āshiyāne ke
inheñ gulchīñ har andāz-e-navāzish bhā nahīñ saktā

bharā jā.egā kab tak ḳhūn-e-māzī nabz-e-fardā meñ
ab is pahlū pe nazm-e-qalb-e-getī aa nahīñ saktā

kise fitna samajh kar apnī mahfil se uThātā hai
zamīr-e-amn is dhoke meñ nādāñ aa nahīñ saktā

sahāb-e-fikr bhī 'yāqūb' pāband-e-fazā niklā
chaman kī ḳhaak par rañg-e-suḳhan barsā nahīñ saktā

main chahun bhi to zabt-e-guftugu main la nahin sakta
samajhne par bhi dil ka muddaa samjha nahin sakta

bhala aisi tahi-daman tamannaon se kya hasil
bahalne par dil aamada hai aur bahla nahin sakta

KHuda mahfuz rakkhe KHauf-e-aseb-e-asiri se
main gulshan mein bhi aazadi ka naghma ga nahin sakta

rag-e-gul se bhi nazuk-tar hain tinke aashiyane ke
inhen gulchin har andaz-e-nawazish bha nahin sakta

bhara jaega kab tak KHun-e-mazi nabz-e-farda mein
ab is pahlu pe nazm-e-qalb-e-geti aa nahin sakta

kise fitna samajh kar apni mahfil se uThata hai
zamir-e-amn is dhoke mein nadan aa nahin sakta

sahab-e-fikr bhi 'yaqub' paband-e-faza nikla
chaman ki KHak par rang-e-suKHan barsa nahin sakta