mashīneñ kaam apnā kar rahī haiñ
hameñ bhī apne jaisā kar rahī haiñ

hazāroñ miil se aatī havā.eñ
yahāñ kohrām barpā kar rahī haiñ

na.ī baisākhiyāñ aks o sadā kī
hamāre qad ko ūñchā kar rahī haiñ

sabhī ko uuñgh sī aane lagī hai
fazā.eñ jādū-Tonā kar rahī haiñ

hamārā dil to hañgāmoñ bharā thā
yahāñ tanhā.iyāñ kyā kar rahī haiñ

ye zālim hañsne vaalī hastiyāñ haiñ
faqat rūmāl giilā kar rahī haiñ

mashinen kaam apna kar rahi hain
hamein bhi apne jaisa kar rahi hain

hazaron mil se aati hawaen
yahan kohram barpa kar rahi hain

nai baisakhiyan aks o sada ki
hamare qad ko uncha kar rahi hain

sabhi ko ungh si aane lagi hai
fazaen jadu-Tona kar rahi hain

hamara dil to hangamon bhara tha
yahan tanhaiyan kya kar rahi hain

ye zalim hansne wali hastiyan hain
faqat rumal gila kar rahi hain