taa.ir ke liye din raat kā Dar
dahlīz pe rizq aur taaq meñ ghar

sab rauzan-e-zindāñ band hue
yā kuchh na rahā zindāñ se udhar

bāhar ye qadam nikleñ to khule
zanjīr madad kartī hai ki dar

maqtal kī zamīñ se phuul ugeñ
jaatā hai kahīñ miTTī kā asar

niiñd aatī hai us ke saa.e meñ
gir jaa.e ye dīvār agar

ham sog haiñ jaage sapnoñ kā
ai raat hameñ mahsūs na kar

jalvaoñ se bahut nazdīk ho tum
ai bul-havso dāman pe nazar

hai apnā qayām is aalam meñ
shabnam kā baserā kāñTe par

yā sirf Dagar thī vaqt na thā
ab sirf hai vaqt kā naam Dagar

kuchh apnī pyāseñ bujh bhī ga.iiñ
kuchh qarz haiñ dariyā-noshoñ par

tair ke liye din raat ka Dar
dahliz pe rizq aur taq mein ghar

sab rauzan-e-zindan band hue
ya kuchh na raha zindan se udhar

bahar ye qadam niklen to khule
zanjir madad karti hai ki dar

maqtal ki zamin se phul ugen
jata hai kahin miTTi ka asar

nind aati hai us ke sae mein
gir jae ye diwar agar

hum sog hain jage sapnon ka
ai raat hamein mahsus na kar

jalwaon se bahut nazdik ho tum
ai bul-hawso daman pe nazar

hai apna qayam is aalam mein
shabnam ka basera kanTe par

ya sirf Dagar thi waqt na tha
ab sirf hai waqt ka nam Dagar

kuchh apni pyasen bujh bhi gain
kuchh qarz hain dariya-noshon par

Source: Book : Bar-e-Safar (Pg. 30) Author : Baqi Siddiqui Publication : Maktaba Urdu Daijest, Lahore (1969) Edition : 1969