Subscribe to our newsletter and get our newest updates

Jamal Owaisi

  • Ghazal


jaane kaise log the yaad aae kam jaane ke baad


jaane kaise log the yaad aa.e kam jaane ke ba.ad
aib saare khul ga.e marhūm kahlāne ke ba.ad

chāñd kā haala mirī āñkhoñ kā jaalā ban gayā
kuchh nazar aayā na phir tere nazar aane ke ba.ad

ādamiyat ke sabhī paimāne ho jaate haiñ paash
bhuuk aisī jāgtī hai peT bhar jaane ke ba.ad

us ne ik ik lafz kā paisa kiyā mujh se vasūl
kal kī shab mīlād meñ taqrīr farmāne ke ba.ad

maiñ ne tā-hadd-e-nazar dekhā koī monis na thā
dopahar ke vaqt barqī-mauj lahrāne ke ba.ad

jaane kaise log the yaad aae kam jaane ke baad
aib sare khul gae marhum kahlane ke baad

chand ka haala meri aankhon ka jala ban gaya
kuchh nazar aaya na phir tere nazar aane ke baad

aadamiyat ke sabhi paimane ho jate hain pash
bhuk aisi jagti hai peT bhar jaane ke baad

us ne ek ek lafz ka paisa kiya mujh se wasul
kal ki shab milad mein taqrir farmane ke baad

main ne ta-hadd-e-nazar dekha koi monis na tha
dopahar ke waqt barqi-mauj lahrane ke baad


Source: Book : 1971 ki Muntakhab Shayri (Pg. 99 ) Author : Kumar Pashi, Prem Gopal Mittal Publication : P.K. Publishers, New Delhi (1972) Edition : 1972

Leave a comment

+