har saañs ko mahkā.iye ab der na kiije
ik phuul sā khil jā.iye ab der na kiije

ik jaam mohabbat se masarrat se bharā jaam
chhalkā.iye chhalkā.iye ab der na kiije

sach kahtā huuñ ik umr se pyāsī hai ye mahfil
paimāna-ba-kaf aa.iye ab der na kiije

sāvan kī ghaTā ban ke sulagtī huī rut meñ
duniyā pe baras jā.iye ab der na kiije

zanjīr meñ jakḌe hue dīvānoñ ko apne
suulī se utarvā.iye ab der na kiije

sannāTā har ik ruuh ko ab Dasne lagā hai
ik giit koī gā.iye ab der na kiije

is ahd-e-sharar-bār pe phir amn kī shabnam
barsā.iye barsā.iye ab der na kiije

talvāroñ ne chamkāyā hai maqtal kī zamīñ ko
talvāroñ ko dafnā.iye ab der na kiije

ik aur hasīñ ḳhvāb ki miT jaa.e shab-e-ġham
'daurāñ' ko bhī dikhlā.iye ab der na kiije

har sans ko mahkaiye ab der na kije
ek phul sa khil jaiye ab der na kije

ek jam mohabbat se masarrat se bhara jam
chhalkaiye chhalkaiye ab der na kije

sach kahta hun ek umr se pyasi hai ye mahfil
paimana-ba-kaf aaiye ab der na kije

sawan ki ghaTa ban ke sulagti hui rut mein
duniya pe baras jaiye ab der na kije

zanjir mein jakDe hue diwanon ko apne
suli se utarwaiye ab der na kije

sannaTa har ek ruh ko ab Dasne laga hai
ek git koi gaiye ab der na kije

is ahd-e-sharar-bar pe phir amn ki shabnam
barsaiye barsaiye ab der na kije

talwaron ne chamkaya hai maqtal ki zamin ko
talwaron ko dafnaiye ab der na kije

ek aur hasin KHwab ki miT jae shab-e-gham
'dauran' ko bhi dikhlaiye ab der na kije