Subscribe to our newsletter and get our newest updates

Ehsan Danish

  • Ghazal


kuchh is tarah se tasawwur mein aa raha hai koi


kuchh is tarah se tasavvur meñ aa rahā hai koī
charāġh ruuh meñ jaise jalā rahā hai koī

koī kalīm uThe varna intizār ke ba.ad
charāġh-e-tūr-e-mohabbat bujhā rahā hai koī

vo dair kā thā ki ka.abe kā ye nahīñ ma.alūm
mirī ḳhudī kā muhāfiz ḳhudā rahā hai koī

jo roknā ho to aa baḌh ke rok le varna
tire hudūd-e-taġhāful se jā rahā hai koī

ravāñ-davāñ nahīñ be-vaj.h kārvān-e-hayāt
mujhe zarūr kahīñ se bulā rahā hai koī

badal rahe haiñ jujūn-o-ḳhirad ke paimāne
kis ehtimām-e-taġhayyur se aa rahā hai koī

na kuchh malāl-e-asīrī na ḳhatra-e-sayyād
qafas samajh ke nasheman banā rahā hai koī

zamīn-o-charḳh ne inkār kar diyā jis se
vo baar dosh-e-vafā par uThā rahā hai koī

jahān-e-nau meñ ba-rañg-e-kashākash-e-paiham
hayāt-e-nau ke salīqe sikhā rahā hai koī

ḳhabar karo ye haqā.eq ke pāsbānoñ ko
majāz kho ke haqīqat meñ aa rahā hai koī

na jaane kaun sī manzil meñ ishq hai ki mujhe
mire hudūd se bāhar bulā rahā hai koī

Daro ḳhudā se baḌā bol bolne vaalo
qarīb ham se bhī be-intihā rahā hai koī

mujhe sitam meñ izāfe kā ġham nahīñ lekin
yaqīn kar ki mire ba.ad aa rahā hai koī

nigāh-o-lab meñ hañsī kī sakat nahīñ lekin
ba-jabr-e-ishq-o-vafā muskurā rahā hai koī

ye sub.h-o-shām kī yūrish ye mausamoñ kī ravish
ki jaise mere ta.āqub meñ aa rahā hai koī

kisī ko is kī ḳhabar hī nahīñ thī kuchh 'ehsān'
ki miT ke apnā zamāna banā rahā hai koī

kuchh is tarah se tasawwur mein aa raha hai koi
charagh ruh mein jaise jala raha hai koi

koi kalim uThe warna intizar ke baad
charagh-e-tur-e-mohabbat bujha raha hai koi

wo dair ka tha ki kabe ka ye nahin malum
meri KHudi ka muhafiz KHuda raha hai koi

jo rokna ho to aa baDh ke rok le warna
tere hudud-e-taghaful se ja raha hai koi

rawan-dawan nahin be-wajh karwan-e-hayat
mujhe zarur kahin se bula raha hai koi

badal rahe hain jujun-o-KHirad ke paimane
kis ehtimam-e-taghayyur se aa raha hai koi

na kuchh malal-e-asiri na KHatra-e-sayyaad
qafas samajh ke nasheman bana raha hai koi

zamin-o-charKH ne inkar kar diya jis se
wo bar dosh-e-wafa par uTha raha hai koi

jahan-e-nau mein ba-rang-e-kashakash-e-paiham
hayat-e-nau ke saliqe sikha raha hai koi

KHabar karo ye haqaeq ke pasbanon ko
majaz kho ke haqiqat mein aa raha hai koi

na jaane kaun si manzil mein ishq hai ki mujhe
mere hudud se bahar bula raha hai koi

Daro KHuda se baDa bol bolne walo
qarib hum se bhi be-intiha raha hai koi

mujhe sitam mein izafe ka gham nahin lekin
yaqin kar ki mere baad aa raha hai koi

nigah-o-lab mein hansi ki sakat nahin lekin
ba-jabr-e-ishq-o-wafa muskura raha hai koi

ye subh-o-sham ki yurish ye mausamon ki rawish
ki jaise mere taaqub mein aa raha hai koi

kisi ko is ki KHabar hi nahin thi kuchh 'ehsan'
ki miT ke apna zamana bana raha hai koi


Leave a comment

+