chashm-e-bīnā ho to qaid-e-haram-o-tūr nahīñ
dekhne vaalī nigāhoñ se vo mastūr nahīñ

kaun sā ghar hai javāñ jalvoñ se pur-nūr nahīñ
ik mire dil kī hī duniyā hai jo ma.amūr nahīñ

apnī himmat hī se pahuñchūñgā sar-e-manzil-e-shauq
luuñ sahārā maiñ kisī kā mujhe manzūr nahīñ

ġham-e-jānāñ ko bhulā duuñ na karūñ dost ko yaad
itnā maiñ ai ġham-e-daurāñ abhī majbūr nahīñ

ye mohabbat kī hai qīmat ye mohabbat kā sila
ki hamāre hī liye ishq kā dastūr nahīñ

donoñ aalam ko Dubo de jo mai-o-mīnā meñ
chashm-e-sāqī ke sivā aur kā maqdūr nahīñ

muskurā do to mirā ġhuncha-dil khil jaa.e
dil kabhī khil na sake aisā bhī ranjūr nahīñ

tum nahīñ paas magar saath hai yādoñ kā hujūm
maiñ akelā nahīñ bekas nahīñ mahjūr nahīñ

aaj kuchh shaam se tārīk hai dil kī mahfil
tum nahīñ ho to vo raunaq nahīñ vo nuur nahīñ

mujh meñ himmat hai ki maiñ raaz ko ifshā na karūñ
ye mirā zarf hai ye sheva-e-mansūr nahīñ

kar sakegā na judā fāsla-e-vaqt-o-makāñ
duur nazroñ se sahī dil se magar duur nahīñ

merī taqdīr meñ 'darshan' haiñ kisī ke jalve
shukr sad shukr ki duniyā mirī be-nūr nahīñ

chashm-e-bina ho to qaid-e-haram-o-tur nahin
dekhne wali nigahon se wo mastur nahin

kaun sa ghar hai jawan jalwon se pur-nur nahin
ek mere dil ki hi duniya hai jo mamur nahin

apni himmat hi se pahunchunga sar-e-manzil-e-shauq
lun sahaara main kisi ka mujhe manzur nahin

gham-e-jaanan ko bhula dun na karun dost ko yaad
itna main ai gham-e-dauran abhi majbur nahin

ye mohabbat ki hai qimat ye mohabbat ka sila
ki hamare hi liye ishq ka dastur nahin

donon aalam ko Dubo de jo mai-o-mina mein
chashm-e-saqi ke siwa aur ka maqdur nahin

muskura do to mera ghuncha-dil khil jae
dil kabhi khil na sake aisa bhi ranjur nahin

tum nahin pas magar sath hai yaadon ka hujum
main akela nahin bekas nahin mahjur nahin

aaj kuchh sham se tarik hai dil ki mahfil
tum nahin ho to wo raunaq nahin wo nur nahin

mujh mein himmat hai ki main raaz ko ifsha na karun
ye mera zarf hai ye shewa-e-mansur nahin

kar sakega na juda fasla-e-waqt-o-makan
dur nazron se sahi dil se magar dur nahin

meri taqdir mein 'darshan' hain kisi ke jalwe
shukr sad shukr ki duniya meri be-nur nahin