Subscribe to our newsletter and get our newest updates

Imdad Ali Bahr

  • Ghazal


dosto dil kahin zinhaar na aane pae


dosto dil kahīñ zinhār na aane paa.e
dil ke hāthoñ koī āzār na aane paa.e

kījiye husn-parastī magar is qaid ke saath
pyārī sūrat pe zarā pyaar na aane paa.e

ḳhāna-e-yār ghar aafat kā hai ai rahgīro
jism par sāya-e-dīvār na aane paa.e

ai junūñ terā zamāne meñ rahe jab tak daur
hosh meñ āshiq-e-sarshār na aane paa.e

aap par uqda-e-nāzuk-kamarī khul jaatā
tā-kamar gesū-e-ḳhamdār na aane paa.e

chashm-e-mahbūb se nargis ko barābar na karo
paas bīmār ke bīmār na aane paa.e

'bahr' kuchh ġham na karo dil ke judā hone kā
ab baġhal meñ ye bad-atvār na aane paa.e

dosto dil kahin zinhaar na aane pae
dil ke hathon koi aazar na aane pae

kijiye husn-parasti magar is qaid ke sath
pyari surat pe zara pyar na aane pae

KHana-e-yar ghar aafat ka hai ai rahgiro
jism par saya-e-diwar na aane pae

ai junun tera zamane mein rahe jab tak daur
hosh mein aashiq-e-sarshaar na aane pae

aap par uqda-e-nazuk-kamari khul jata
ta-kamar gesu-e-KHamdar na aane pae

chashm-e-mahbub se nargis ko barabar na karo
pas bimar ke bimar na aane pae

'bahr' kuchh gham na karo dil ke juda hone ka
ab baghal mein ye bad-atwar na aane pae


Leave a comment

+