Subscribe to our newsletter and get our newest updates

Naqqash Ali Balooch

  • Ghazal


qatra hun magar raunaq-e-sahra hun bura hun


qatra huuñ magar raunaq-e-sahrā huuñ burā huuñ
mazlūm ke zaḳhmoñ kā masīhā huuñ burā huuñ

vo bai.at-e-fir.aun ke qaa.il haiñ so achchhe
maiñ vaqt ke namrūd se uljhā huuñ burā huuñ

tāġhūt-e-zamāna ko vo dete haiñ salāmī
maiñ us ko ḳhatā-kār jo kahtā huuñ burā huuñ

vo shahr meñ karte haiñ añdheroñ kī tijārat
maiñ zulm kī bastī kā ujālā huuñ burā huuñ

vo shāh-e-sitam-kār ke kahte haiñ qasīde
maiñ nauha-e-mazlūm jo kartā huuñ burā huuñ

vo ḳhānqahī diin ke pairav haiñ azal se
maiñ aaj talak sāhab-e-illā huuñ burā huuñ

'naqqāsh' vahī lā hai mire sher-o-suḳhan meñ
anjām shahādat hai maiñ sachchā huuñ burā huuñ

qatra hun magar raunaq-e-sahra hun bura hun
mazlum ke zaKHmon ka masiha hun bura hun

wo baiat-e-firaun ke qail hain so achchhe
main waqt ke namrud se uljha hun bura hun

taghut-e-zamana ko wo dete hain salami
main us ko KHata-kar jo kahta hun bura hun

wo shahr mein karte hain andheron ki tijarat
main zulm ki basti ka ujala hun bura hun

wo shah-e-sitam-kar ke kahte hain qaside
main nauha-e-mazlum jo karta hun bura hun

wo KHanqahi din ke pairaw hain azal se
main aaj talak sahab-e-illa hun bura hun

'naqqash' wahi la hai mere sher-o-suKHan mein
anjam shahadat hai main sachcha hun bura hun


Leave a comment

+