Subscribe to our newsletter and get our newest updates

D. Raj Kanwal

  • Ghazal


duniya patthar phenk rahi hai jhunjhla kar farzanon par


duniyā patthar pheñk rahī hai jhuñjhlā kar farzānoñ par
ab vo kyā ilzām dharegī ham jaise dīvānoñ par

dil kī kaliyāñ afsurda sī har chehra māyūs magar
baaġh mahakte dekh rahā huuñ ghāToñ par shamshānoñ par

patthar dil haiñ log yahāñ ke ye patthar kyā pighleñge
kis ne bārish hote dekhī tapte registānoñ par

jin kī ek nazar ke badle ham ne duniyā Thukrā dī
naam hamārā sun kar rakkheñ haath vo apne kānoñ par

aaheñ aañsū pesh kiye to ghabrā ke muñh pher liyā
un ko shāyad ġhussa aayā mere in nazrānoñ par

kyā taqdīr kā shikva yaaro apnī apnī qismat hai
apnā haath gayā hai aksar TuuTe se paimānoñ par

aaj 'kañval' ham kuchh bhī kah leñ baat magar ye sachchī hai
aaj kā ik ik pal bhārī hai pichhle ka.ī zabānoñ par

duniya patthar phenk rahi hai jhunjhla kar farzanon par
ab wo kya ilzam dharegi hum jaise diwanon par

dil ki kaliyan afsurda si har chehra mayus magar
bagh mahakte dekh raha hun ghaTon par shamshanon par

patthar dil hain log yahan ke ye patthar kya pighlenge
kis ne barish hote dekhi tapte registanon par

jin ki ek nazar ke badle hum ne duniya Thukra di
nam hamara sun kar rakkhen hath wo apne kanon par

aahen aansu pesh kiye to ghabra ke munh pher liya
un ko shayad ghussa aaya mere in nazranon par

kya taqdir ka shikwa yaro apni apni qismat hai
apna hath gaya hai aksar TuTe se paimanon par

aaj 'kanwal' hum kuchh bhi kah len baat magar ye sachchi hai
aaj ka ek ek pal bhaari hai pichhle kai zabanon par


Source: Shauq Ka Daftar

Leave a comment

+