Subscribe to our newsletter and get our newest updates

Bahadur Shah Zafar

  • Ghazal


kyunkar na KHaksar rahen ahl-e-kin se dur


kyūñkar na ḳhāksār raheñ ahl-e-kīñ se duur
dekho zamīñ falak se falak hai zamīñ se duur

parvāna vasl-e-sham.a pe detā hai apnī jaañ
kyūñkar rahe dil us ke ruḳh-e-ātishīñ se duur

mazmūn-e-vasl-o-hijr jo naame meñ hai raqam
hai harf bhī kahīñ se mile aur kahīñ se duur

go tīr-e-be-gumāñ hai mire paas par abhī
jaa.e nikal ke sīna-e-charḳh-e-barīñ se duur

vo kaun hai ki jaate nahīñ aap jis ke paas
lekin hamesha bhāgte ho tum hamīñ se duur

hairān huuñ ki us ke muqābil ho ā.īna
jo pur-ġhurūr khiñchtā hai māh-e-mubīñ se duur

yaañ tak adū kā paas hai un ko ki bazm meñ
vo baiThte bhī haiñ to mire ham-nashīñ se duur

manzūr ho jo diid tujhe dil kī aañkh se
pahuñche tirī nazar nigah-e-dūr-bīñ se duur

duniyā-e-dūñ kī de na mohabbat ḳhudā 'zafar'
insāñ ko pheñk de hai ye īmān o diiñ se duur

kyunkar na KHaksar rahen ahl-e-kin se dur
dekho zamin falak se falak hai zamin se dur

parwana wasl-e-shama pe deta hai apni jaan
kyunkar rahe dil us ke ruKH-e-atishin se dur

mazmun-e-wasl-o-hijr jo name mein hai raqam
hai harf bhi kahin se mile aur kahin se dur

go tir-e-be-guman hai mere pas par abhi
jae nikal ke sina-e-charKH-e-barin se dur

wo kaun hai ki jate nahin aap jis ke pas
lekin hamesha bhagte ho tum hamin se dur

hairan hun ki us ke muqabil ho aaina
jo pur-ghurur khinchta hai mah-e-mubin se dur

yan tak adu ka pas hai un ko ki bazm mein
wo baiThte bhi hain to mere ham-nashin se dur

manzur ho jo did tujhe dil ki aankh se
pahunche teri nazar nigah-e-dur-bin se dur

duniya-e-dun ki de na mohabbat KHuda 'zafar'
insan ko phenk de hai ye iman o din se dur


Source: Rooh-e-Ghazal,Pachas Sala Intekhab

Leave a comment

+