Subscribe to our newsletter and get our newest updates

Kaif Ahmed Siddiqui

  • Ghazal


hum ek Dhalti hui dhup ke taaqub mein


ham ek Dhaltī huī dhuup ke ta.āqub meñ
haiñ tez-gām saa.e saa.e jaate haiñ

chaman meñ shiddat-e-dard-e-numūd se ġhunche
taḌap rahe haiñ magar muskurā.e jaate haiñ

maiñ vo ḳhizāñ kā barahana-badan shajar huuñ jise
libās-e-zaḳhm-e-bahārāñ pahnā.e jaate haiñ

shafaq kī jhiil meñ jab bhī hai Dūbtā sūraj
to paas dhuup hī jaatī na saa.e jaate haiñ

ye zindagī vo taḌaptī ġhazal hai 'kaif' jise
har ek sāz-e-havādis pe gaa.e jaate haiñ

hum ek Dhalti hui dhup ke taaqub mein
hain tez-gam sae sae jate hain

chaman mein shiddat-e-dard-e-numud se ghunche
taDap rahe hain magar muskurae jate hain

main wo KHizan ka barahana-badan shajar hun jise
libas-e-zaKHm-e-bahaaran pahnae jate hain

shafaq ki jhil mein jab bhi hai Dubta suraj
to pas dhup hi jati na sae jate hain

ye zindagi wo taDapti ghazal hai 'kaif' jise
har ek saz-e-hawadis pe gae jate hain


Leave a comment

+