husn par jāñ-nisār kartā huuñ
sham.a-rūoñ ko pyaar kartā huuñ

aap ke ishq ne jo baḳhshe haiñ
un ġhamoñ kā shumār kartā huuñ

aah īmāñ-parast ho kar bhī
ek kāfir se pyaar kartā huuñ

mujh pe vo mashq-e-nāz karte haiñ
shukr-e-parvardigār kartā huuñ

dil ko har dam fareb detā huuñ
aap kā intizār kartā huuñ

go tirā ahd ahd-e-bātil hai
phir bhī maiñ e'tibār kartā huuñ

gul-ruḳhoñ kī adā adā pe 'naresh'
maiñ dil-o-jāñ nisār kartā huuñ

husn par jaan-nisar karta hun
shama-ruon ko pyar karta hun

aap ke ishq ne jo baKHshe hain
un ghamon ka shumar karta hun

aah iman-parast ho kar bhi
ek kafir se pyar karta hun

mujh pe wo mashq-e-naz karte hain
shukr-e-parwardigar karta hun

dil ko har dam fareb deta hun
aap ka intizar karta hun

go tera ahd ahd-e-baatil hai
phir bhi main e'tibar karta hun

gul-ruKHon ki ada ada pe 'naresh'
main dil-o-jaan nisar karta hun