Subscribe to our newsletter and get our newest updates

Faez Dehlvi

  • Ghazal


KHuban ke bich jaanan mumtaz hai sarapa


ḳhūbāñ ke biich jānāñ mumtāz hai sarāpā
andāz-e-dilbarī meñ ejaaz hai sarāpā

pal pal maTak ke dekhe Dag Dag chale laTak ke
vo shoḳh chhal chhabīlā tannāz hai sarāpā

tirchhī nigāh karnā katrā ke baat sunñā
majlis meñ āshiqoñ kī andāz hai sarāpā

nainoñ meñ us kī jaadū zulfāñ meñ us kī phandā
dil ke shikār meñ vo shahbāz hai sarāpā

ġhamza nigah taġhāful añkhiyāñ siyāh o chanchal
yā rab nazar na laage andāz hai sarāpā

us ke ḳhirām uupar tā.ūs mast haigā
vo miir dil-rabābī tannāz hai sarāpā

kisht-e-ummīd kartā sarsabz sabza-e-ḳhat
anjām-e-husn us kā āġhāz hai sarāpā

vaqt-e-nazāra 'fā.ez' dildār kā yahī hai
bistar nahīñ badan par tan-bāz hai sarāpā

KHuban ke bich jaanan mumtaz hai sarapa
andaz-e-dilbari mein ejaz hai sarapa

pal pal maTak ke dekhe Dag Dag chale laTak ke
wo shoKH chhal chhabila tannaz hai sarapa

tirchhi nigah karna katra ke baat sunna
majlis mein aashiqon ki andaz hai sarapa

nainon mein us ki jadu zulfan mein us ki phanda
dil ke shikar mein wo shahbaz hai sarapa

ghamza nigah taghaful ankhiyan siyah o chanchal
ya rab nazar na lage andaz hai sarapa

us ke KHiram upar taus mast haiga
wo mir dil-rababi tannaz hai sarapa

kisht-e-ummid karta sarsabz sabza-e-KHat
anjam-e-husn us ka aaghaz hai sarapa

waqt-e-nazara 'faez' dildar ka yahi hai
bistar nahin badan par tan-baz hai sarapa

RECITATIONS Fasih Akmal



00:00/00:00 KHuban ke bich jaanan mumtaz hai sarapa Fasih Akmal

Leave a comment

+