Subscribe to our newsletter and get our newest updates

Habeeb Ahmad Siddiqui

  • Ghazal


KHizan-nasib ki hasrat ba-ru-e-kar na ho


ḳhizāñ-nasīb kī hasrat ba-rū-e-kār na ho
bahār sho.abada-e-chashm-e-intizār na ho

fareb-ḳhurda-e-ulfat se pūchhiye kyā hai
vo ek ahd-e-mohabbat ki ustuvār na ho

nazar ko tāb-e-nazāra na dil ko jur.at-e-dīd
jamāl-e-yār se yuuñ koī sharmsār na ho

qabā-darīda-o-dāmān-o-āstīñ ḳhūnīñ
guloñ ke bhes meñ ye koī dil-figār na ho

na ho sakegā vo ramz-āshnā-e-kaif-e-hayāt
jo qalb chashm-e-taġhāful kā rāzdār na ho

tarīq-e-ishq pe hañstī to hai ḳhirad lekin
ye gumrahī kahīñ manzil se ham-kanār na ho

na ta.ana-zan ho koī ahl-e-hosh mastoñ par
ki zo.am-e-hosh bhī ik ālam-e-ḳhumār na ho

vo kyā batā.e ki kyā shai umiid hotī hai
jise nasīb kabhī shām-e-intizār na ho

ye chashm-e-lutf mubārak magar dil-e-nādāñ
payām-e-ishva-e-rañgīñ salā-e-dār na ho

kisī ke lab pe jo aa.e naved-e-zīst bane
vahī hadīs-e-vafā jis pe e.atibār na ho

jo do-jahān bhī māñge to maiñ ne kyā māñgā
vo kyā talab jo ba-qadr-e-atā-e-yār na ho

KHizan-nasib ki hasrat ba-ru-e-kar na ho
bahaar shoabada-e-chashm-e-intizar na ho

fareb-KHurda-e-ulfat se puchhiye kya hai
wo ek ahd-e-mohabbat ki ustuwar na ho

nazar ko tab-e-nazara na dil ko jurat-e-did
jamal-e-yar se yun koi sharmsar na ho

qaba-darida-o-daman-o-astin KHunin
gulon ke bhes mein ye koi dil-figar na ho

na ho sakega wo ramz-ashna-e-kaif-e-hayat
jo qalb chashm-e-taghaful ka raazdar na ho

tariq-e-ishq pe hansti to hai KHirad lekin
ye gumrahi kahin manzil se ham-kanar na ho

na tana-zan ho koi ahl-e-hosh maston par
ki zoam-e-hosh bhi ek aalam-e-KHumar na ho

wo kya batae ki kya shai umid hoti hai
jise nasib kabhi sham-e-intizar na ho

ye chashm-e-lutf mubarak magar dil-e-nadan
payam-e-ishwa-e-rangin sala-e-dar na ho

kisi ke lab pe jo aae nawed-e-zist bane
wahi hadis-e-wafa jis pe eatibar na ho

jo do-jahan bhi mange to main ne kya manga
wo kya talab jo ba-qadr-e-ata-e-yar na ho


Leave a comment

+