Subscribe to our newsletter and get our newest updates

Najma Shaheen Khosa

  • Ghazal


kahin pe gard kahin par hawa banati hun


kahīñ pe gard kahīñ par havā banātī huuñ
maiñ ḳhud ko ab to bas apne sivā banātī huuñ

kahīñ pe taare kahīñ par haiñ aas ke jugnū
ḳhizāñ meñ bhī maiñ guloñ kī fazā banātī huuñ

bikhar ga.e the kisī naam ke hurūf kahīñ
ab un ko joḌ kar ik aa.ina banātī huuñ

ye tai hai us ko agar lauT kar nahīñ aanā
to kis liye maiñ duā ko asā banātī huuñ

ujāltā hai ye tārīkiyāñ mire dil kī
tumhārī yaad ko har pal diyā banātī huuñ

jab apne ashk chhupātī huuñ muskurāhaT se
to apne dard ko apnī davā banātī huuñ

tarāsh kar kisī patthar ke ek paikar ko
kamāl-e-ishq se us ko ḳhudā banātī huuñ

ki ḳhvāb meñ rahe tā-der guftugū tujh se
zarā sī baat ko maiñ vāqi.a banātī huuñ

sunā thā maiñ ne jo 'shāhīn' ek lamhe ko
is ek lamhe ko apnī sadā banātī huuñ

kahin pe gard kahin par hawa banati hun
main KHud ko ab to bas apne siwa banati hun

kahin pe tare kahin par hain aas ke jugnu
KHizan mein bhi main gulon ki faza banati hun

bikhar gae the kisi nam ke huruf kahin
ab un ko joD kar ek aaina banati hun

ye tai hai us ko agar lauT kar nahin aana
to kis liye main dua ko asa banati hun

ujalta hai ye tarikiyan mere dil ki
tumhaari yaad ko har pal diya banati hun

jab apne ashk chhupati hun muskurahaT se
to apne dard ko apni dawa banati hun

tarash kar kisi patthar ke ek paikar ko
kamal-e-ishq se us ko KHuda banati hun

ki KHwab mein rahe ta-der guftugu tujh se
zara si baat ko main waqia banati hun

suna tha main ne jo 'shahin' ek lamhe ko
is ek lamhe ko apni sada banati hun


Leave a comment

+