shām-e-ġham afsurda-o-hairāñ the ham
log samjhe be-sar-o-sāmāñ the ham

tez thī itnī zamāne kī havā
pairahan-dar-pairahan uryāñ the ham

ham se be-ma.anī gurez-o-iḳhtilāf
ham-nashīñ do roz ke mehmāñ the ham

aaj apnī shahriyat mashkūk hai
ek din is mulk ke sultāñ the ham

zindagī kyā hashr kā maidān thī
apnī apnī fikr meñ ġhaltāñ the ham

munkashif the ham pe asrār-e-jamāl
rāz-dār-e-jalva-e-jānāñ the ham

thī hamīñ se garmī-e-mahfil 'qadīr'
dāstān-e-zīst ke unvāñ the ham

sham-e-gham afsurda-o-hairan the hum
log samjhe be-sar-o-saman the hum

tez thi itni zamane ki hawa
pairahan-dar-pairahan uryan the hum

hum se be-mani gurez-o-iKHtilaf
ham-nashin do roz ke mehman the hum

aaj apni shahriyat mashkuk hai
ek din is mulk ke sultan the hum

zindagi kya hashr ka maidan thi
apni apni fikr mein ghaltan the hum

munkashif the hum pe asrar-e-jamal
raaz-dar-e-jalwa-e-jaanan the hum

thi hamin se garmi-e-mahfil 'qadir'
dastan-e-zist ke unwan the hum

Source: Rooh-e-Ghazal,Pachas Sala Intekhab