miTTī thā aur duudh meñ gūñdhā gayā mujhe
ik chāñd ke vajūd meñ gūñdhā gayā mujhe

maiñ niist aur nabūd kī ik kaifiyat meñ thā
jab vahm-e-hast-o-būd meñ gūñdhā gayā mujhe

maiñ chashm-e-kam-rasā se jise dekhtā na thā
us ḳhvāb-e-lā-hudūd meñ gūñdhā gayā mujhe

ḳhas-ḳhāna-e-ziyāñ kī shararbāriyoñ ke ba.ad
yaḳh-zār-e-nār-e-sūd meñ gūñdhā gayā mujhe

ik dast-e-ġhaib ne mujhe lā chaak par dharā
phir vaqt ke jumūd meñ gūñdhā gayā mujhe

is meñ to āsmāñ ke shajar bhī samar na deñ
jis ḳhāk-e-be-numūd meñ gūñdhā gayā mujhe

qaus-e-quzah kī samt bahut dekhtā thā maiñ
āḳhir ġhubār-o-dūd meñ gūñdhā gayā mujhe

miTTi tha aur dudh mein gundha gaya mujhe
ek chand ke wajud mein gundha gaya mujhe

main nist aur nabud ki ek kaifiyat mein tha
jab wahm-e-hast-o-bud mein gundha gaya mujhe

main chashm-e-kam-rasa se jise dekhta na tha
us KHwab-e-la-hudud mein gundha gaya mujhe

KHas-KHana-e-ziyan ki shararbariyon ke baad
yaKH-zar-e-nar-e-sud mein gundha gaya mujhe

ek dast-e-ghaib ne mujhe la chaak par dhara
phir waqt ke jumud mein gundha gaya mujhe

is mein to aasman ke shajar bhi samar na den
jis KHak-e-be-numud mein gundha gaya mujhe

qaus-e-quzah ki samt bahut dekhta tha main
aaKHir ghubar-o-dud mein gundha gaya mujhe

Source: Book : sargoshiyan zamanon ki (Pg. 137)