Subscribe to our newsletter and get our newest updates

Chandar Bhan Kaifi Dehelvi

  • Ghazal


har aarzu mein rang hai bagh-o-bahaar ka


har aarzū meñ rañg hai bāġh-o-bahār kā
kāñTā bhī ek phuul hai us ḳhār-zār kā

kuchh is tarah se aao ki dil ko ḳhabar na ho
kuchh vasl meñ bhī lutf rahe intizār kā

bū-e-vafā na DhūñDhiye laala ke daaġh meñ
kyā ye bhī koī dil hai kisī dil-figār kā

laġhzish hui to paañv pe saaqī ke gir paḌe
behoshiyoñ se kaam liyā hoshiyār kā

sar-chashma-e-sarāb fareb-e-majāz hai
kyā e'tibār zindagī-e-musta.ār kā

irfāñ kī raushnī se kudūrat chalī ga.ī
ā.īna ban gayā mire musht-e-ġhubār kā

daur-e-shabāb kī vo tarañgeñ kahāñ ga.iiñ
ḳhamyāza dekhtā hai ye 'kaifī' ḳhumār kā

har aarzu mein rang hai bagh-o-bahaar ka
kanTa bhi ek phul hai us KHar-zar ka

kuchh is tarah se aao ki dil ko KHabar na ho
kuchh wasl mein bhi lutf rahe intizar ka

bu-e-wafa na DhunDhiye lala ke dagh mein
kya ye bhi koi dil hai kisi dil-figar ka

laghzish hui to panw pe saqi ke gir paDe
behoshiyon se kaam liya hoshiyar ka

sar-chashma-e-sarab fareb-e-majaz hai
kya e'tibar zindagi-e-mustaar ka

irfan ki raushni se kudurat chali gai
aaina ban gaya mere musht-e-ghubar ka

daur-e-shabab ki wo tarangen kahan gain
KHamyaza dekhta hai ye 'kaifi' KHumar ka


Leave a comment

+