tanhā.ī meñ aksar yahī mahsūs huā hai
jis tarah koī merī taraf dekh rahā hai

DhūñDā koī sāthī jo kabhī dasht-e-vafā meñ
ik apnā hī saaya mujhe har baar milā hai

siine meñ hai mahfūz matā-e-ġham-e-daurāñ
dībācha-e-ayyām mire dil pe likhā hai

aahaT sī shab-e-ġham jo tujhe dī hai sunā.ī
ai dil vo tire apne dhaḌakne kī sadā hai

ho ḳhair charāġhān-e-sar-e-rāhguzar kī
sunte haiñ bahut tez zamāne kī havā hai

yak-rañg kahāñ hotī hai insān kī fitrat
har phuul kī ḳhushbū hai alag rañg judā hai

maġhrūr na ho husn pe a sham-e-farozāñ
parvāne kī āñkhoñ meñ koī aur ziyā hai

niiñd aatī hai yazdānī-e-muztar ko sakūñ se
ye maut hai yā dost ke dāman kī havā hai

tanhai mein aksar yahi mahsus hua hai
jis tarah koi meri taraf dekh raha hai

DhunDa koi sathi jo kabhi dasht-e-wafa mein
ek apna hi saya mujhe har bar mila hai

sine mein hai mahfuz mata-e-gham-e-dauran
dibacha-e-ayyam mere dil pe likha hai

aahaT si shab-e-gham jo tujhe di hai sunai
ai dil wo tere apne dhaDakne ki sada hai

ho KHair charaghan-e-sar-e-rahguzar ki
sunte hain bahut tez zamane ki hawa hai

yak-rang kahan hoti hai insan ki fitrat
har phul ki KHushbu hai alag rang juda hai

maghrur na ho husn pe a sham-e-farozan
parwane ki aankhon mein koi aur ziya hai

nind aati hai yazdani-e-muztar ko sakun se
ye maut hai ya dost ke daman ki hawa hai