chehra-e-sub.h nazar aayā ruḳh-e-shām ke baad
sab ko pahchān liyā gardish-e-ayyām ke baad

mil ga.ī rāh-e-yaqīñ manzil-e-auhām ke baad
jalve hī jalve nazar aa.e dar-o-bām ke baad

chāhiye ahl-e-mohabbat ko ki dīvāna baneñ
koī ilzām na aa.egā is ilzām ke baad

imtehān-e-talb-e-ḳhām liyā saaqī ne
jām-e-lab-rez diyā durd-e-tah-e-jām ke baad

haa.e kyā chiiz hai ye lutf-e-shikastā-pā.ī
hausle aur baḌhe koshish-e-nākām ke baad

zindagī naam hai ik johd-e-musalsal kā 'fanā'
rāh-rau aur bhī thak jaatā hai ārām ke baad

chehra-e-subh nazar aaya ruKH-e-sham ke baad
sab ko pahchan liya gardish-e-ayyam ke baad

mil gai rah-e-yaqin manzil-e-auham ke baad
jalwe hi jalwe nazar aae dar-o-baam ke baad

chahiye ahl-e-mohabbat ko ki diwana banen
koi ilzam na aaega is ilzam ke baad

imtehan-e-talb-e-KHam liya saqi ne
jam-e-lab-rez diya durd-e-tah-e-jam ke baad

hae kya chiz hai ye lutf-e-shikasta-pai
hausle aur baDhe koshish-e-nakaam ke baad

zindagi nam hai ek johd-e-musalsal ka 'fana'
rah-rau aur bhi thak jata hai aaram ke baad

Source: Book : Gunaah-e-sukhan (Pg. 21) Author : Kanti Mohan 'Soz' Publication : Kanti Mohan 'Soz' (1990) Edition : 1990