Subscribe to our newsletter and get our newest updates

Habab Tirmizi

  • Ghazal


aaj unhen dekh liya bazm mein farzanon ki


aaj unheñ dekh liyā bazm meñ farzānoñ kī
ham ne tārīf sunī thī tire dīvānoñ kī

dīda-var silsial-e-ashk samajhte haiñ jise
kahkashāñ hai mire mahbūb ke ehsānoñ kī

tum ko aanā hai to aa jaao ujālā hai abhī
sham.eñ raushan haiñ mire ġham ke shabistānoñ kī

mo'tariz haiñ mirī dīvāna-vashī par vo log
jin ko dāman kī ḳhabar hai na garebānoñ kī

ham haiñ mai-ḳhāna-e-fitrat ke sharābī ham ko
na surāhī kī zarūrat hai na paimānoñ kī

hañs rahe ho to hañso aur hañso ḳhuub hañso
hālat-e-zār pe ham be-sar-o-sāmānoñ kī

ahd-e-hāzir ke na.e 'mīr' vahāñ hoñge 'habāb'
mujh ko mahfil meñ na le jaao suḳhan-dānoñ kī

aaj unhen dekh liya bazm mein farzanon ki
hum ne tarif suni thi tere diwanon ki

dida-war silsial-e-ashk samajhte hain jise
kahkashan hai mere mahbub ke ehsanon ki

tum ko aana hai to aa jao ujala hai abhi
shamen raushan hain mere gham ke shabistanon ki

mo'tariz hain meri diwana-washi par wo log
jin ko daman ki KHabar hai na garebanon ki

hum hain mai-KHana-e-fitrat ke sharabi hum ko
na surahi ki zarurat hai na paimanon ki

hans rahe ho to hanso aur hanso KHub hanso
haalat-e-zar pe hum be-sar-o-samanon ki

ahd-e-hazir ke nae 'mir' wahan honge 'habab'
mujh ko mahfil mein na le jao suKHan-danon ki


Pachas Sala Intekhab"

Leave a comment

+