azdavājī zindagī bhī aur tijārat bhī adab bhī
kitnā kār-āmad hai sab kuchh aur kaisā be-sabab bhī

jis ke ek ik harf-e-shīrīñ kā asar hai zahr-āgīñ
kyā hikāyat likh ga.e mere laboñ par us ke lab bhī

umr bhar tār-e-nafas ik hijr hī kā silsila hai
vo na mil paa.e agar to aur agar mil jaa.e tab bhī

log achchhe zindagī pyārī hai duniyā ḳhūbsūrat
aah kaisī ḳhush-kalāmī kar rahī hai rūh-e-shab bhī

lafz par mafhūm us lamhe kuchh aisā multafit hai
jaise az-ḳhud ho ināyat bosa-e-lab be-talab bhī

nā-tavāñ kam-zarf isyāñ kār-e-jāhil aur kyā kyā
pyaar se mujh ko bulātā hai vo merā ḳhush-laqab bhī

ham bhī haiñ pābandī-e-iz.hār se bezār lekin
kuchh salīqa to suḳhan kā ho hunar kā koī Dhab bhī

naam nisbat milkiyyat kuchh bhī nahīñ baaqī agarche
'sāz' us kūche meñ merā ghar huā kartā hai ab bhī

azdawaji zindagi bhi aur tijarat bhi adab bhi
kitna kar-amad hai sab kuchh aur kaisa be-sabab bhi

jis ke ek ek harf-e-shirin ka asar hai zahr-agin
kya hikayat likh gae mere labon par us ke lab bhi

umr bhar tar-e-nafas ek hijr hi ka silsila hai
wo na mil pae agar to aur agar mil jae tab bhi

log achchhe zindagi pyari hai duniya KHubsurat
aah kaisi KHush-kalami kar rahi hai ruh-e-shab bhi

lafz par mafhum us lamhe kuchh aisa multafit hai
jaise az-KHud ho inayat bosa-e-lab be-talab bhi

na-tawan kam-zarf isyan kar-e-jahil aur kya kya
pyar se mujh ko bulata hai wo mera KHush-laqab bhi

hum bhi hain pabandi-e-izhaar se bezar lekin
kuchh saliqa to suKHan ka ho hunar ka koi Dhab bhi

nam nisbat milkiyyat kuchh bhi nahin baqi agarche
'saz' us kuche mein mera ghar hua karta hai ab bhi