Subscribe to our newsletter and get our newest updates

Yunus Tahseen

  • Ghazal


shor se pak shab-o-roz guzare ghar mein


shor se paak shab-o-roz guzāre ghar meñ
ham ki tarse hī rahe koī pukāre ghar meñ

ham yatīmoñ ko kahāñ aate the naḳhre karne
ya.anī jhagḌā nahīñ hotā thā hamāre ghar meñ

ham to bas ek hī kone meñ paḌe rahte the
aur mahrūmī rahā kartī thī saare ghar meñ

āyateñ kaan meñ paḌtī thiiñ sahar hone par
ham to rahte the jahāñ bhar se niyāre ghar meñ

ek mamtā thī jise ham ne ḳhudā samjhā thā
jab vo hañstī thī utarte the sitāre ghar meñ

ek hasrat ki maiñ huqqe kī chilam bhar kar duuñ
ek ḳhvāhish ki mirā baap khañkāre ghar meñ

chār-dīvārī thī ġhurbat bhī thī ya.anī 'tahsīn'
ek dīvār ziyāda thī hamāre ghar meñ

shor se pak shab-o-roz guzare ghar mein
hum ki tarse hi rahe koi pukare ghar mein

hum yatimon ko kahan aate the naKHre karne
yani jhagDa nahin hota tha hamare ghar mein

hum to bas ek hi kone mein paDe rahte the
aur mahrumi raha karti thi sare ghar mein

aayaten kan mein paDti thin sahar hone par
hum to rahte the jahan bhar se niyare ghar mein

ek mamta thi jise hum ne KHuda samjha tha
jab wo hansti thi utarte the sitare ghar mein

ek hasrat ki main huqqe ki chilam bhar kar dun
ek KHwahish ki mera bap khankare ghar mein

chaar-diwari thi ghurbat bhi thi yani 'tahsin'
ek diwar ziyaada thi hamare ghar mein


Source: Intikhab-e-wajid ali shah akhtar

Leave a comment

+