Subscribe to our newsletter and get our newest updates

Liyaqat Ali Aasim

  • Ghazal


mile to kash mera hath tham kar le jae


mile to kaash mirā haath thaam kar le jaa.e
vo apne ghar na sahī mujh ko mere ghar le jaa.e

butān-e-shahr tumhāre larazte hāthoñ meñ
koī to sañg ho aisā ki merā sar le jaa.e

diyā karūñgā yūñhī tere naam kī dastak
mirā nasīb mujhe laakh dar-ba-dar le jaa.e

vo aadmī ho ki ḳhushbū bahut hī rusvā hai
havā-e-shahr jise apne dosh par le jaa.e

mire qarīb se guzre to ahl-e-dil bole
uThā ke kaun parinda lahū meñ tar le jaa.e

palaT ke aa.e to shāyad na kuchh dikhā.ī de
vo jā rahā hai to 'āsim' mirī nazar le jaa.e

mile to kash mera hath tham kar le jae
wo apne ghar na sahi mujh ko mere ghar le jae

butan-e-shahr tumhaare larazte hathon mein
koi to sang ho aisa ki mera sar le jae

diya karunga yunhi tere nam ki dastak
mera nasib mujhe lakh dar-ba-dar le jae

wo aadmi ho ki KHushbu bahut hi ruswa hai
hawa-e-shahr jise apne dosh par le jae

mere qarib se guzre to ahl-e-dil bole
uTha ke kaun parinda lahu mein tar le jae

palaT ke aae to shayad na kuchh dikhai de
wo ja raha hai to 'asim' meri nazar le jae


Source: Book : Quarterly Urdu International (Pg. 123) Author : Ashfaq Hussain Publication : 80, Richmond Street West, Suite 201, Toronto, Ontario Canada M5H 2A4 (May, July 1983 Issue-2) Edition : May, July 1983 Issue-2

Leave a comment

+