us but se mil kar is dil-e-nādāñ ko kyā huā
kyuuñ āh-o-zārī hai lab-e-ḳhandāñ ko kyā huā

dīvāne apnā chāk-e-garebāñ to sī chuke
ab tak na aa.ī fasl-e-bahārāñ ko kyā huā

donoñ-jahāñ haiñ muntazir-e-roz-e-hashr phir
us shoḳh chashm-e-fitna-e-daurāñ ko kyā huā

phūloñ meñ koī bū hai na kaliyoñ meñ tāzgī
ai andalīb rañg-e-gulistāñ ko kyā huā

dil meñ vahī ḳhalish hai vahī iztirāb hai
chāragaroñ ke da.ava-e-darmāñ ko kyā huā

dil pūchhtā hai aaj bhī vo rashk-e-nau-bahār
aayā na us ke va.ada-o-paimāñ ko kyā huā

karte ho aaj kufr kī bāteñ jagah jagah
'āfat' tumhāre diin ko īmāñ ko kyā huā

us but se mil kar is dil-e-nadan ko kya hua
kyun aah-o-zari hai lab-e-KHandan ko kya hua

diwane apna chaak-e-gareban to si chuke
ab tak na aai fasl-e-bahaaran ko kya hua

donon-jahan hain muntazir-e-roz-e-hashr phir
us shoKH chashm-e-fitna-e-dauran ko kya hua

phulon mein koi bu hai na kaliyon mein tazgi
ai andalib rang-e-gulistan ko kya hua

dil mein wahi KHalish hai wahi iztirab hai
chaaragaron ke dawa-e-darman ko kya hua

dil puchhta hai aaj bhi wo rashk-e-nau-bahaar
aaya na us ke wada-o-paiman ko kya hua

karte ho aaj kufr ki baaten jagah jagah
'afat' tumhaare din ko iman ko kya hua

Source: Deewan-e-Waleeullah Muhib