Subscribe to our newsletter and get our newest updates

Kaleem Sahasrami

  • Ghazal


kisi ki jab se jafaon ka silsila na raha


kisī kī jab se jafāoñ kā silsila na rahā
dil-e-hazīñ meñ mohabbat kā hausla na rahā

dayār-e-husn meñ miltī nahīñ hai jins-e-vafā
dil-e-ġharīb kā ab un se vāsta na rahā

havā-e-yās ne sham-e-umīd gul kar dī
kisī se ab koī shikva bhī barmalā na rahā

mirī nazar kā taqāzā bhalā vo kyā samjheñ
ki husn-o-ishq meñ pahlā sā rābta na rahā

ujaḌ gayā hai kuchh is tarah ab dayār-e-vafā
kahīñ bhī merī tamannā kā naqsh-e-pā na rahā

ḳhudī na ho sakī minnat-kash-e-nashāt-e-vafā
hamārā haath kabhī mā.il-e-duā na rahā

'kalīm' kaun musībat meñ kis kā hotā hai
dayār-e-dost meñ koī bhī āshnā na rahā

kisi ki jab se jafaon ka silsila na raha
dil-e-hazin mein mohabbat ka hausla na raha

dayar-e-husn mein milti nahin hai jins-e-wafa
dil-e-gharib ka ab un se wasta na raha

hawa-e-yas ne sham-e-umid gul kar di
kisi se ab koi shikwa bhi barmala na raha

meri nazar ka taqaza bhala wo kya samjhen
ki husn-o-ishq mein pahla sa rabta na raha

ujaD gaya hai kuchh is tarah ab dayar-e-wafa
kahin bhi meri tamanna ka naqsh-e-pa na raha

KHudi na ho saki minnat-kash-e-nashat-e-wafa
hamara hath kabhi mail-e-dua na raha

'kalim' kaun musibat mein kis ka hota hai
dayar-e-dost mein koi bhi aashna na raha


Source: Book : Aiwan (Pg. 92) Author : Manazir Ashiq Harganvi & Shahid Nayeem Publication : Nirali Duniya (1998) Edition : 1998

Leave a comment

+