Subscribe to our newsletter and get our newest updates

Yagana Changezi

  • Ghazal


kyun kisi se wafa kare koi


kyuuñ kisī se vafā kare koī
dil na maane to kyā kare koī

na davā chāhiye mujhe na duā
kaash apnī davā kare koī

muflisī meñ mizāj shāhāna
kis maraz kī davā kare koī

dard ho to davā bhī mumkin hai
vahm kī kyā davā kare koī

hañs bhī letā huuñ uuprī dil se
jī na bahle to kyā kare koī

maut bhī aa sakī na muñh-māñgī
aur kyā iltijā kare koī

dard-e-dil phir kahīñ na karvaT le
ab na chauñke ḳhudā kare koī

ishq-bāzī kī intihā mālūm
shauq se ibtidā kare koī

kohkan aur kyā banā letā
ban ke bigḌe to kyā kare koī

apne dam kī hai raushnī saarī
dīda-e-dil to vā kare koī

sham.a kyā sham.a kā ujālā kyā
din chaḌhe sāmnā kare koī

ġhālib aur mīrzā 'yagānā' kā
aaj kyā faisla kare koī

kyun kisi se wafa kare koi
dil na mane to kya kare koi

na dawa chahiye mujhe na dua
kash apni dawa kare koi

muflisi mein mizaj shahana
kis maraz ki dawa kare koi

dard ho to dawa bhi mumkin hai
wahm ki kya dawa kare koi

hans bhi leta hun upri dil se
ji na bahle to kya kare koi

maut bhi aa saki na munh-mangi
aur kya iltija kare koi

dard-e-dil phir kahin na karwaT le
ab na chaunke KHuda kare koi

ishq-bazi ki intiha malum
shauq se ibtida kare koi

kohkan aur kya bana leta
ban ke bigDe to kya kare koi

apne dam ki hai raushni sari
dida-e-dil to wa kare koi

shama kya shama ka ujala kya
din chaDhe samna kare koi

ghaalib aur mirza 'yagana' ka
aaj kya faisla kare koi


Pachas Sala Intekhab"

Leave a comment

+