ġhubār-e-dard se saarā badan aTā niklā
jise bhī ḳhanda-ba-lab dekhā ġham-zadā niklā

ab ehtiyāt bhī aur kyā ho be-libās to huuñ
ik āstīn se maanā ki azhdahā niklā

mire ḳhulūs pe shak kī to koī vaj.h nahīñ
mire libās meñ ḳhanjar agar chhupā niklā

lagā jo piiTh meñ neza to samjhe dushman hai
magar palaT ke jo dekhā to āshnā niklā

mire lahū se hai rañgīñ jabīn-e-sub.h to kyā
chalo ki zulmat-e-shab kā to hauslā niklā

ye haath raakh meñ ḳhvāboñ kī Dālte to ho
magar jo raakh meñ shola koī dabā niklā

sunā thā hadd-e-tabassum hai āñsuoñ se qarīb
baḌhe jo aage to barsoñ kā fāslā niklā

vo ek harf-e-tamannā jo kahte Darte the
zabāñ pe aayā to un kā hī mudda.ā niklā

kulāh kaj kiye din bhar jo shaḳhs phirtā thā
galī meñ shaam ko dekhā to vo gadā niklā

tulū sub.h 'na.īmī' jahāñ se honī thī
usī ufuq se andheroñ kā silsilā niklā

ghubar-e-dard se sara badan aTa nikla
jise bhi KHanda-ba-lab dekha gham-zada nikla

ab ehtiyat bhi aur kya ho be-libas to hun
ek aastin se mana ki azhdaha nikla

mere KHulus pe shak ki to koi wajh nahin
mere libas mein KHanjar agar chhupa nikla

laga jo piTh mein neza to samjhe dushman hai
magar palaT ke jo dekha to aashna nikla

mere lahu se hai rangin jabin-e-subh to kya
chalo ki zulmat-e-shab ka to hausla nikla

ye hath rakh mein KHwabon ki Dalte to ho
magar jo rakh mein shola koi daba nikla

suna tha hadd-e-tabassum hai aansuon se qarib
baDhe jo aage to barson ka fasla nikla

wo ek harf-e-tamanna jo kahte Darte the
zaban pe aaya to un ka hi muddaa nikla

kulah kaj kiye din bhar jo shaKHs phirta tha
gali mein sham ko dekha to wo gada nikla

tulu subh 'naimi' jahan se honi thi
usi ufuq se andheron ka silsila nikla

Source: Book : Intekhab Kalam Lala M.R Jauhar (Pg. 55)