Subscribe to our newsletter and get our newest updates

Naaz Muradabadi

  • Ghazal


dil shab-e-furqat sukun ki justuju karta raha


dil shab-e-furqat sukūñ kī justujū kartā rahā
rāt-bhar dīvār-o-dar se guftugū kartā rahā

jo bahāroñ kī chaman meñ aarzū kartā rahā
nazr-e-rañg-o-bū ḳhud apnā hī lahū kartā rahā

apnī nazroñ ko ḳharāb-e-justujū kartā rahā
jo musalsal imityāz-e-rañg-o-bū kartā rahā

shīsha-e-dil jo nazākat meñ guhar se kam nahīñ
ishq meñ kaise sitam sahne kī ḳhū kartā rahā

āshiqī meñ us kī nākāmī bhī nākāmī nahīñ
jo fanā ho kar bhī terī justujū kartā rahā

terī chashm-e-mast se piine ke jo qābil na thā
mai-kade meñ ḳhvāhish-e-jām-o-subū kartā rahā

sochnā ye hai ki us ke ḳhūn-e-dil ko kyā huā
jo qafas meñ ārzū-e-rañg-o-bū kartā rahā

dil ne josh-e-shauq meñ kitne hī sajde kar liye
dīda-e-tar ḳhūn-e-dil se hī vuzū kartā rahā

jis ne paiham koshisheñ kiiñ amn-e-ālam ke liye
vo ḳhud apne hī chaman ko surḳh-rū kartā rahā

vo sitam Dhāte rahe har dil pe aur har zaḳhm-e-dil
shikva-e-bedād unhīñ ke rū-ba-rū kartā rahā

aise dīvāne ko kyā chāk-e-garebāñ kī ho qadr
umr-bhar jo chāk-e-dāman hī rafū kartā rahā

saare aalam ko rahī ai 'nāz' us kī justujū
apne jalvoñ ko ayaañ vo kū-ba-kū kartā rahā

dil shab-e-furqat sukun ki justuju karta raha
raat-bhar diwar-o-dar se guftugu karta raha

jo bahaaron ki chaman mein aarzu karta raha
nazr-e-rang-o-bu KHud apna hi lahu karta raha

apni nazron ko KHarab-e-justuju karta raha
jo musalsal imityaz-e-rang-o-bu karta raha

shisha-e-dil jo nazakat mein guhar se kam nahin
ishq mein kaise sitam sahne ki KHu karta raha

aashiqi mein us ki nakaami bhi nakaami nahin
jo fana ho kar bhi teri justuju karta raha

teri chashm-e-mast se pine ke jo qabil na tha
mai-kade mein KHwahish-e-jam-o-subu karta raha

sochna ye hai ki us ke KHun-e-dil ko kya hua
jo qafas mein aarzu-e-rang-o-bu karta raha

dil ne josh-e-shauq mein kitne hi sajde kar liye
dida-e-tar KHun-e-dil se hi wuzu karta raha

jis ne paiham koshishen kin amn-e-alam ke liye
wo KHud apne hi chaman ko surKH-ru karta raha

wo sitam Dhate rahe har dil pe aur har zaKHm-e-dil
shikwa-e-bedad unhin ke ru-ba-ru karta raha

aise diwane ko kya chaak-e-gareban ki ho qadr
umr-bhar jo chaak-e-daman hi rafu karta raha

sare aalam ko rahi ai 'naz' us ki justuju
apne jalwon ko ayan wo ku-ba-ku karta raha


Source: Mizrab

Leave a comment

+