kho.e hue sahrā tak ai bād-e-sabā jaanā
vo ḳhāk-e-junūñ merī ā.ankhoñ se lagā jaanā

ab tak koī chiñgārī rah rah ke chamaktī hai
ai qāfila-e-fardā ye raakh uḌā jaanā

hai dasht-e-tamannā meñ ab shaam kā sannāTā
haañ tez qadam rakhte ai ahl-e-vafā jaanā

ham niiñd kī chādar meñ lipTe hue chalte haiñ
is bhes meñ ab ham se milnā ho to aa jaanā

āfāq kī sarhad par saa.e se gurezāñ haiñ
in soḳhta-jānoñ ko us paar na thā jaanā

tum duur safar kar ke nazdīk se lagte ho
ab paas bahut aa ke ham ko na jagā jaanā

kyā us se shikāyat ho jis shoḳh kī aadat ho
kuchh baat dabā lenā kuchh aañkh churā jaanā

ham zikr-e-gul-o-bulbul karte hue Darte haiñ
ab siikh gayā hai vo har baat kā pā jaanā

khoe hue sahra tak ai baad-e-saba jaana
wo KHak-e-junun meri aaankhon se laga jaana

ab tak koi chingari rah rah ke chamakti hai
ai qafila-e-farda ye rakh uDa jaana

hai dasht-e-tamanna mein ab sham ka sannaTa
han tez qadam rakhte ai ahl-e-wafa jaana

hum nind ki chadar mein lipTe hue chalte hain
is bhes mein ab hum se milna ho to aa jaana

aafaq ki sarhad par sae se gurezan hain
in soKHta-jaanon ko us par na tha jaana

tum dur safar kar ke nazdik se lagte ho
ab pas bahut aa ke hum ko na jaga jaana

kya us se shikayat ho jis shoKH ki aadat ho
kuchh baat daba lena kuchh aankh chura jaana

hum zikr-e-gul-o-bulbul karte hue Darte hain
ab sikh gaya hai wo har baat ka pa jaana

Source: Book : siip (Magzin) (Pg. 265) Author : Nasiim Durraani Publication : Fikr-e-Nau ( 39 (Quarterly) ) Edition :  39 (Quarterly)