Subscribe to our newsletter and get our newest updates

Mahir Bilgrami

  • Ghazal


munfarid to hai tera koi muqabil na hua


munfarid to hai tirā koī muqābil na huā
koī maḳhlūq bhī kaunain meñ kāmil na huā

ik tamāshā vo bhī dīdār ke qābil na huā
raqs-e-bismil jo sar-e-kūcha-e-qātil na huā

dil jo qurbānī-e-parvāna kā hāmil na huā
darḳhur-e-anjuman-e-sham.a-shamā.il na huā

kaun hai terī ināyat kā jo qaa.il na huā
kis ke dukh-sukh meñ to vaqt aane pe shāmil na huā

jāñ-ba-haq ho gayā taslīm alag baat hai ye
rah-rav-e-ishq yuuñ āsūda-e-manzil na huā

aañkh kyā aañkh nahīñ tāb-e-nazāra jis ko
dil vo kyā dard-e-mohabbat kā jo hāmil na huā

roz-e-avval se haiñ sargarm-e-talāsh-e-mahbūb
ham sā koī magar āvāra-e-manzil na huā

ḳhud-kushī shiddat-e-īzā-e-vafā meñ tauba
buzdilī kahiye ise ye hal-e-mushkil na huā

aisā lagtā hai asīrān-e-qafas chhūT ga.e
aaj har din kī tarah shor-e-salāsil na huā

juz dil-e-ahl-e-suḳhan lahn meñ Dhal kar ilhām
dahr meñ har kas-o-nā-kas pe to nāzil na huā

karvaTeñ liiñ to bahut husn kī ra.anā.ī ne
ishq kā rañg pa 'māhir' kabhī zaa.il na huā

munfarid to hai tera koi muqabil na hua
koi maKHluq bhi kaunain mein kaamil na hua

ek tamasha wo bhi didar ke qabil na hua
raqs-e-bismil jo sar-e-kucha-e-qatil na hua

dil jo qurbani-e-parwana ka hamil na hua
darKHur-e-anjuman-e-shama-shamail na hua

kaun hai teri inayat ka jo qail na hua
kis ke dukh-sukh mein to waqt aane pe shamil na hua

jaan-ba-haq ho gaya taslim alag baat hai ye
rah-raw-e-ishq yun aasuda-e-manzil na hua

aankh kya aankh nahin tab-e-nazara jis ko
dil wo kya dard-e-mohabbat ka jo hamil na hua

roz-e-awwal se hain sargarm-e-talash-e-mahbub
hum sa koi magar aawara-e-manzil na hua

KHud-kushi shiddat-e-iza-e-wafa mein tauba
buzdili kahiye ise ye hal-e-mushkil na hua

aisa lagta hai asiran-e-qafas chhuT gae
aaj har din ki tarah shor-e-salasil na hua

juz dil-e-ahl-e-suKHan lahn mein Dhal kar ilham
dahr mein har kas-o-na-kas pe to nazil na hua

karwaTen lin to bahut husn ki ranai ne
ishq ka rang pa 'mahir' kabhi zail na hua


Leave a comment

+