Subscribe to our newsletter and get our newest updates

Jameel Mazhari

  • Ghazal


badal jate hain dil haalat jab karwaT badalte hain


badal jaate haiñ dil hālāt jab karvaT badalte haiñ
mohabbat ke tasavvur bhī na.e sāñchoñ meñ Dhalte haiñ

tabassum jab kisī kā ruuh meñ tahlīl hotā hai
to dil kī bāñsurī se nit na.e naġhme nikalte haiñ

mohabbat jin ke dil kī dhaḌkanoñ ko tez rakhtī hai
vo aksar vaqt kī raftār se aage bhī chalte haiñ

ujāle ke pujārī muzmahil kyuuñ haiñ andhere se
ki ye taare nigalte haiñ to sūraj bhī ugalte haiñ

inhī hairat-zada āñkhoñ se dekhe haiñ vo aañsū bhī
jo aksar dhuup meñ mehnat kī peshānī se Dhalte haiñ

mohabbat to talab kī raah meñ ik aisī Thokar hai
ki jis se zindagī kī ret meñ zamzam ubalte haiñ

ġhubār-e-kārvāñ haiñ vo na pūchho iztirāb un kā
kabhī aage bhī chalte haiñ kabhī pīchhe bhī chalte haiñ

diloñ ke nāḳhudā uTh kar sambhāleñ kashtiyāñ apnī
bahut se aise tūfāñ 'maz.harī' ke dil meñ palte haiñ

badal jate hain dil haalat jab karwaT badalte hain
mohabbat ke tasawwur bhi nae sanchon mein Dhalte hain

tabassum jab kisi ka ruh mein tahlil hota hai
to dil ki bansuri se nit nae naghme nikalte hain

mohabbat jin ke dil ki dhaDkanon ko tez rakhti hai
wo aksar waqt ki raftar se aage bhi chalte hain

ujale ke pujari muzmahil kyun hain andhere se
ki ye tare nigalte hain to suraj bhi ugalte hain

inhi hairat-zada aankhon se dekhe hain wo aansu bhi
jo aksar dhup mein mehnat ki peshani se Dhalte hain

mohabbat to talab ki rah mein ek aisi Thokar hai
ki jis se zindagi ki ret mein zamzam ubalte hain

ghubar-e-karwan hain wo na puchho iztirab un ka
kabhi aage bhi chalte hain kabhi pichhe bhi chalte hain

dilon ke naKHuda uTh kar sambhaalen kashtiyan apni
bahut se aise tufan 'mazhari' ke dil mein palte hain

RECITATIONS Nomaan Shauque



00:00/00:00 badal jate hain dil haalat jab karwaT badalte hain Nomaan Shauque

Source: Rooh-e-Ghazal,Pachas Sala Intekhab

Leave a comment

+