ik imārat na.ī ta.amīr huī jaatī hai
shahr kī ik na.ī tafsīr huī jaatī hai

ai mire azm-e-safar khīñch ki le jā mujh ko
ik qasam paañv kī zanjīr huī jaatī hai

khīñchne aa.ī hai ab maut mire dāman ko
aap ke ḳhvāb kī ta.abīr huī jaatī hai

had to ye hai ki mirī zaat ke andar bhī ab
jā-ba-jā aap kī jāgīr huī jaatī hai

maiñ ne to ḳhvāb samundar ki hī paale the magar
ye nadī kis liye ta.abīr huī jaatī hai

kyā ġhazab hai ki tere naam kī tohmat kab se
be-sabab mere baġhal-gīr huī jaatī hai

phuul ke jism pe titlī kā lahū hai 'fānī'
kyā mire ahd kī tasvīr huī jaatī hai

ek imarat nai tamir hui jati hai
shahr ki ek nai tafsir hui jati hai

ai mere azm-e-safar khinch ki le ja mujh ko
ek qasam panw ki zanjir hui jati hai

khinchne aai hai ab maut mere daman ko
aap ke KHwab ki tabir hui jati hai

had to ye hai ki meri zat ke andar bhi ab
ja-ba-ja aap ki jagir hui jati hai

main ne to KHwab samundar ki hi pale the magar
ye nadi kis liye tabir hui jati hai

kya ghazab hai ki tere nam ki tohmat kab se
be-sabab mere baghal-gir hui jati hai

phul ke jism pe titli ka lahu hai 'fani'
kya mere ahd ki taswir hui jati hai