hashr-e-zulmāt se dil Dartā hai
is ghanī raat se dil Dartā hai

barf-e-ehsās na gal jaa.e kahīñ
sail-e-auqāt se dil Dartā hai

tū bhī ai dost na ho jaa.e judā
ab har ik baat se dil Dartā hai

ye kaḌī dhuup dahaktā sūraj
saa.e ke saat se dil Dartā hai

haa.e vo reñgtī tanhā.ī jab
apnī hī zaat se dil Dartā hai

kaise dekheñge vo ujḌī āñkheñ
ab mulāqāt se dil Dartā hai

zaḳhm ho jā.eñge bāġhoñ ke hare
'shām' barsāt se dil Dartā hai

hashr-e-zulmat se dil Darta hai
is ghani raat se dil Darta hai

barf-e-ehsas na gal jae kahin
sail-e-auqat se dil Darta hai

tu bhi ai dost na ho jae juda
ab har ek baat se dil Darta hai

ye kaDi dhup dahakta suraj
sae ke sat se dil Darta hai

hae wo rengti tanhai jab
apni hi zat se dil Darta hai

kaise dekhenge wo ujDi aankhen
ab mulaqat se dil Darta hai

zaKHm ho jaenge baghon ke hare
'sham' barsat se dil Darta hai

Source: Rooh-e-Ghazal,Pachas Sala Intekhab